ភ្នំពេញ៖ ទីតាំងហាងមួយកន្លែងយីហោ ចំការស្នេហ៍ ត្រូវបានកម្លាំងនាយកដ្ឋានប្រឆាំងការជួញដូរមនុស្ស និងការពារអនិតិជនសហការជាមួយកម្លាំងសមត្ថកិច្ចជំនាញមូលដ្ឋានខណ្ឌសែនសុខ ចុះឆ្មក់បង្រ្កាប និងឃាត់ខ្លួនមនុស្សប្រុសស្រីបានជាច្រើននាក់ រួមទាំងសម្ភារៈមួយចំនួនសង្ស័យពាក់ព័ន្ធករណីបំរើសេវាផ្លូវភេទខុសច្បាប់។

ប្រតិបត្តិការនេះ ធ្វើឡើងកាលពីវេលាម៉ោង៩និង៣០នាទីយប់ថ្ងៃទី២៥ ខែមិថុនាឆ្នាំ ២០២៥ ស្ថិតនៅតាមបណ្តោយផ្លូវលំ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពែញ។

មន្រ្តីនគរបាលជំនាញ បានឲ្យដឹងថា ដោយទីតាំងភោជនីដ្ឋានមួយកន្លែងយីហោ ចំការស្នេហ៍ សង្ស័យថាមានលួចបង្កប់នៅសេវាបម្រើសេវាផ្លូវភេទខុសច្បាប់ ទើបសមត្ថកិច្ចនាយកដ្ឋានប្រឆាំងការជួញដូរមនុស្សនិងការពារអនិកជនសហការជាមួយ និងកម្លាំងសមត្ថកិច្ចនៃអធិការដ្ឋាននគបាលខណ្ឌសែនសុខធ្វើការស្រាវជ្រាវ រហូតចុះឆ្មក់បង្រ្កាបជាក់ស្តែងតែម្តង បន្ទាប់មកសមត្ថកិច្ចជំនាញក៏បានចូលទៅពិនិត្យនៅតាមបន្ទប់ និងកញ្ចុះនីមួយៗ ហើយប្រមូលបានសម្ភារៈមួយចំនួនធំ និងធ្វើការឃាត់ខ្លួនមនុស្សប្រុសស្រីដែលបំរើកាងារនៅក្នុងហាងបានជាច្រើននាក់រួមទាំងម្ចាស់ហាង។

ក្រោយពីសមត្ថកិច្ចឃាត់ខ្លួនរួចបាននាំខ្លួនមនុស្សតាមរថយន្តប្រភេទសាំយ៉ុងចំនួន៤គ្រឿងក្នុងនោះមានស្រី និងប្រុសជាច្រើននាក់បញ្ជូនយកទៅអគ្គស្នងការនគបាលជាតិ ដើម្បីសួរនាំបន្តនិងចាត់ការបន្តតាមនីតិវិធីច្បាប់៕ អត្ថបទ៖ កុម្ភៈ