លោកប្រធានាធិបតីអាមេរិក Donald Trump បាននិយាយកាលពីថ្ងៃពុធ (២៥ មិថុនា) ថា ទីក្រុងវ៉ាស៊ីនតោន មិនបានបោះបង់ចោលសម្ពាធអតិបរិមារបស់ខ្លួនលើអ៊ីរ៉ង់នោះទេ រួមទាំងការរឹតបន្តឹងលើការលក់ប្រេងអ៊ីរ៉ង់ ប៉ុន្តែក៏បានបង្ហាញសញ្ញាពីលទ្ធភាពនៃការបន្ធូរបន្ថយក្នុងការអនុវត្តទណ្ឌកម្មទាំងនោះដើម្បីជួយប្រទេសនេះក្នុងការកសាងឡើងវិញ។

នៅពេលត្រូវសាកសួរថាតើលោកកំពុងបន្ធូរបន្ថយទណ្ឌកម្មប្រេងលើអ៊ីរ៉ង់ឬទេ លោក Trump បានឆ្លើយនៅក្នុងសន្និសីទសារព័ត៌មាននៅឯកិច្ចប្រជុំកំពូលណាតូថា "អ៊ីរ៉ង់នឹងត្រូវការប្រាក់ដើម្បីធ្វើអោយប្រទេសនោះមានរូបរាងឡើងវិញ ហើយអាមេរិក ចង់មើលឃើញរឿងនេះកើតឡើង"។

លោក Trump បាននិយាយនៅមួយថ្ងៃមុននោះថា ចិនអាចបន្តទិញប្រេងពីអ៊ីរ៉ង់ បន្ទាប់ពីអ៊ីស្រាអែល និងអ៊ីរ៉ង់បានយល់ព្រមលើបទឈប់បាញ់ ប៉ុន្តែក្រោយមកសេតវិមានបានបំភ្លឺថា ការលើកឡើងរបស់លោកមិនបង្ហាញពីការបន្ធូរបន្ថយទណ្ឌកម្មរបស់សហរដ្ឋអាមេរិកនោះទេ។

លោក Steve Witkoff ប្រេសិតមជ្ឈិមបូព៌ារបស់លោក Trump បានប្រាប់ប្រព័ន្ធផ្សព្វផ្សាយ CNBC ថា ការអត្ថាធិប្បាយរបស់លោក Trump លើលទ្ធភាពដែលចិនអាចទិញប្រេងអ៊ីរ៉ង់ "គឺជាសញ្ញាមួយដល់ភាគីចិនថា អាមេរិកចង់ធ្វើការជាមួយពួកគេ ហើយថា អាមេរិកមិនចាប់អារម្មណ៍ក្នុងការធ្វើឱ្យប៉ះពាល់ដល់សេដ្ឋកិច្ចរបស់ពួកគេទេ"។ គួរឱ្យដឹងថា ចិនជាអ្នកទិញប្រេងឆៅលំដាប់កំពូលរបស់អ៊ីរ៉ង់ ហើយបានប្រឆាំងជាយូរមកហើយចំពោះទណ្ឌកម្មរបស់លោក Trump លើប្រេង៕