ឯកសារកញ្ចប់ថវិកាឆ្នាំ២០២៦ របស់អាមេរិក ដែលចេញផ្សាយនៅថ្ងៃពុធ (២៥ មិថុនា) បង្ហាញថា លោកប្រធានាធិបតី Donald Trump ចង់បានការដំឡើងប្រាក់ឈ្នួលសម្រាប់កងទ័ព មីស៊ីល និងយានដ្រូនបច្ចេកវិទ្យាខ្ពស់កាន់តែច្រើន នៅក្នុងថវិកាការពារជាតិឆ្នាំក្រោយនេះ ខណៈកាត់បន្ថយមុខតំណែងក្នុងកងទ័ពជើងទឹក ហើយការទិញនាវា និងយន្តហោះចម្បាំងតិចជាងមុន ដើម្បីសន្សំប្រាក់។

ក្នុងទំហំទឹកប្រាក់ ៨៩២,៦ពាន់លានដុល្លារ សំណើថវិកាការពារជាតិ និងសន្តិសុខជាតិអាមេរិក ឆ្នាំ២០២៦នេះ មានទំហំប្រហាក់ប្រហែលនឹងកញ្ចប់ឆ្នាំ២០២៥ របស់អតីតប្រធានាធិបតី Joe Biden។ មូលនិធិភាគច្រើនសម្រាប់ខែលការពារមីស៊ីល Golden Dome របស់លោក Trump ត្រូវបានរួមបញ្ចូលនៅក្នុងសំណើថវិកាដាច់ដោយឡែកមួយផ្សេងទៀត ហើយមិនមែនជាផ្នែកនៃសំណើចុងក្រោយបង្អស់ ដែលត្រូវបញ្ជូនទៅសភានោះទេ។

ក្នុងកញ្ចប់នេះ លោក Trump បានស្នើទិញយន្តហោះចម្បាំង F-35 តិចជាងមុន ដែលផលិតដោយក្រុមហ៊ុន Lockheed Martin ហើយមានតែនាវាចម្បាំង ៣គ្រឿងប៉ុណ្ណោះ។ កងទ័ពជើងទឹកនិយាយថា លទ្ធកម្ម (ការទិញ-លក់) នៃនាវាថ្នាក់ Virginia មួយគ្រឿង និងនាវា ១៥ផ្សេងទៀត ត្រូវបានរំពឹងថានឹងបញ្ចូលទៅក្នុងសំណើសមស្របដាច់ដោយឡែកមួយ។

ថវិកានេះស្នើដំឡើងប្រាក់ឈ្នួល ៣,៨% សម្រាប់កងទ័ព ប៉ុន្តែក៏កាត់ការចំណាយដោយការឈប់ប្រើប្រាស់សព្វាវុធចាស់ៗ រួមទាំងនាវា និងយន្តហោះដែលមានតម្លៃថ្លៃខ្លាំងសម្រាប់ប្រតិបត្តិការ។ នៅក្រោមផែនការនេះ កងទ័ពជើងទឹកនឹងកាត់បន្ថយកម្លាំងបុគ្គលិកស៊ីវិលរបស់ខ្លួនចំនួន ៧.២៨៦នាក់។

បើប្រៀបធៀបទៅនឹងថវិការបស់លោក Biden ពីឆ្នាំចុងក្រោយក្នុងតំណែង ដែលបានស្នើទិញយន្តហោះ F-35 ចំនួន ៦៨គ្រឿងក្នុងឆ្នាំសារពើពន្ធ២០២៥នោះ សំណើឆ្នាំ២០២៦ របស់លោក Trump នេះចង់បានយន្តហោះចម្បាំងតែ ៤៧គ្រឿងប៉ុណ្ណោះ។ កងទ័ពអាកាសកំពុងបន្តការវិនិយោគលើមីស៊ីលទំនើបៗរយៈចម្ងាយឆ្ងាយៗ និងកាន់តែមានប្រសិទ្ធភាពនៅប៉ាស៊ីហ្វិក រួមទាំងយានដ្រូនខ្នាតតូចជាច្រើន៕