សារព័ត៌មាន Channel 12 បានរាយការណ៍ដោយដកស្រង់សម្ដីមន្ត្រីអ៊ីស្រាអែលមួយរូបថា រដ្ឋាភិបាលអ៊ីស្រាអែល បានសម្រេចចិត្តផ្អាកការបញ្ជូនជំនួយទៅតំបន់ហ្កាហ្សាស្ទ្រីប ដែលកំពុងជួបវិបត្តិភាពអត់ឃ្លានធ្ងន់ធ្ងរ។

របាយការណ៍នេះកើតឡើងភ្លាមៗ បន្ទាប់ពីការិយាល័យរបស់លោកនាយករដ្ឋមន្ត្រី Benjamin Netanyahu បានប្រកាសថា លោកបានបញ្ជាឱ្យយោធាបង្ហាញផែនការមួយក្នុងពេលពីរថ្ងៃបន្ទាប់ អំពីវិធីសាស្រ្តរារាំងក្រុមហាម៉ាស មិនឱ្យលួចជំនួយមនុស្សធម៌។

Channel 12 បានដកស្រង់សម្តីមន្ត្រីអ៊ីស្រាអែល ដែលនិយាយថា សេចក្តីថ្លែងការណ៍របស់ការិយាល័យនាយករដ្ឋមន្ត្រីនេះធ្វើឡើងបន្ទាប់ពីរដ្ឋមន្ត្រីក្រសួងហិរញ្ញវត្ថុ លោក Bezalel Smotrich គំរាមចាកចេញពីរដ្ឋាភិបាល ប្រសិនបើមិនចាត់វិធានការបន្ទាន់ដើម្បីទប់ស្កាត់ការលួចជំនួយពីក្រុមហាម៉ាសទេនោះ។

មន្ត្រីរូបនេះសង្កត់ធ្ងន់ថា ការផ្អាកផ្តល់ជំនួយនឹងនៅតែមានរហូតដល់ យោធាបង្ហាញផែនការរបស់ខ្លួន។ កាលពីចុងខែសភា អង្គការសហប្រជាជាតិព្រមានថា ហ្កាហ្សាគឺជា "កន្លែងស្រេកឃ្លានបំផុតលើផែនដីនេះ" ហើយប្រជាជនទាំងមូលរបស់ខ្លួនប្រឈមនឹងគ្រោះទុរ្ភិក្ស ខណៈពលរដ្ឋប៉ាឡេស្ទីន ដែលអស់សង្ឃឹម ត្រូវបានបាញ់សម្លាប់ អត់ឃ្លាន និងបង្ខំឱ្យភៀសខ្លួនពីផ្ទះសម្បែងរបស់ពួកគេ៕