ប្រធានអាជ្ញាធរប៉ាឡេស្ទីន លោក ម៉ាខ្មូដ អាបាស ( Mahmoud Abbas ) កាលពីថ្ងៃពុធ បានបង្ហាញពីការត្រៀមខ្លួន ដើម្បីធ្វើកិច្ចសហប្រតិបត្តិការជាមួយប្រធានាធិបតីអាមេរិក លោក ដូណាល់ ត្រាំ ( Donald Trump) ដើម្បីសម្រេចបាននូវកិច្ចព្រមព្រៀងសន្តិភាពគ្រប់ជ្រុងជ្រោយ ដែលធានាសន្តិសុខ និងស្ថិរភាពនៅមជ្ឈិមបូព៌ា។

នៅក្នុងលិខិតមួយផ្ញើជូនលោក ត្រាំ ដូចដែលបានរាយការណ៍ដោយទីភ្នាក់ងារសារព័ត៌មានផ្លូវការរបស់ប៉ាឡេស្ទីន WAFA លោក អាបាស បានស្វាគមន៍កិច្ចខិតខំប្រឹងប្រែងការទូតនាពេលថ្មីៗនេះ ដើម្បីកាត់បន្ថយភាពតានតឹង នៅក្នុងតំបន់ រួមទាំងបទឈប់បាញ់រវាងអ៊ីស្រាអែល និងអ៊ីរ៉ង់ផងដែរ។

លោកបានពណ៌នាបទឈប់បាញ់នេះថា ជា «ជំហានដ៏ចាំបាច់ និងសំខាន់» ឆ្ពោះទៅរកការដោះស្រាយវិបត្តិក្នុងតំបន់។

លោក អាបាស បានសរសើរជំហររបស់លោក ត្រាំ ចំពោះស្ថានភាពនៅតំបន់ហ្កាហ្សាស្ទ្រីប ជាពិសេសការអំពាវនាវរបស់លោកឲ្យមានបទឈប់បាញ់ជាបន្ទាន់ និងយូរអង្វែង។

លោកបាននិយាយថា កិច្ចខិតខំប្រឹងប្រែងបែបនេះ គឺជាវិធានការបែបស្ថាបនាឆ្ពោះទៅរកការបង្កើតសន្តិភាពដ៏ត្រឹមត្រូវ និងទូលំទូលាយរវាងប៉ាឡេស្ទីន និងអ៊ីស្រាអែល ខណៈពេលដែលស្តារក្តីសង្ឃឹមដល់ប្រជាជនក្នុងតំបន់។

ប្រធានអាជ្ញាធរប៉ាឡេស្ទីនរូបនេះ បានបញ្ជាក់ពីឆន្ទៈរបស់លោក ក្នុងការសម្របសម្រួលជាមួយសហរដ្ឋអាមេរិក អារ៉ាប់ និងដៃគូអន្តរជាតិ និងភាគីដទៃទៀត ដើម្បីបន្តការចរចាសន្តិភាព។

លោកបានសង្កត់ធ្ងន់លើសារៈសំខាន់នៃការកំណត់ពេលវេលាច្បាស់លាស់ និងមានការព្រមព្រៀងគ្នា ដើម្បីបញ្ចប់ការគ្រប់គ្រងរបស់អ៊ីស្រាអែល និងសម្រេចបាននូវសន្តិភាព និងសន្តិសុខប្រកបដោយចីរភាពសម្រាប់ទាំងអស់គ្នា។