ប្រមុខ CIA និយាយថា «ការស៊ើបការណ៍គួរឱ្យទុកចិត្តបាន» បង្ហាញថាកម្មវិធីនុយក្លេអ៊ែររបស់ប្រទេសអ៊ីរ៉ង់ បានរង «ការបំផ្លាញធ្ងន់ធ្ងរ» ដោយសារតែការវាយប្រហាររបស់សហរដ្ឋអាមេរិកកាលពីពេលថ្មីៗនេះ ហើយអាចនឹងចំណាយពេលច្រើនឆ្នាំដើម្បីសាងសង់ឡើងវិញ។

នៅក្នុងសេចក្តីថ្លែងការណ៍មួយកាលពីថ្ងៃពុធ នាយក CIA លោក John Ratcliffe បានលើកឡើងពី «ការស៊ើបការណ៍សម្ងាត់ថ្មីពីប្រភពគួរឱ្យទុកចិត្តបានជាប្រវត្តិសាស្ត្រនិងត្រឹមត្រូវថា រោងចក្រនុយក្លេអ៊ែរអ៊ីរ៉ង់សំខាន់ៗមួយចំនួនត្រូវបានបំផ្លាញ ហើយនឹងត្រូវសាងសង់ឡើងវិញក្នុងរយៈពេលច្រើនឆ្នាំ»។

ប្រព័ន្ធផ្សព្វផ្សាយCNN និងប្រព័ន្ធផ្សព្វផ្សាយអាមេរិកផ្សេងទៀត បានរាយការណ៍ថា ការវាយតម្លៃនៃការស៊ើបការណ៍ដំបូងបានបង្ហាញថា ការវាយប្រហារតាមអាកាសរបស់សហរដ្ឋអាមេរិក ពុំបានបំផ្លាញសមាសធាតុស្នូលនៃកម្មវិធីនុយក្លេអ៊ែររបស់អ៊ីរ៉ង់ទេ ហើយទំនងជាស្តារឡើងវិញត្រឹមតែប៉ុន្មានខែប៉ុណ្ណោះ។

ប្រធានាធិបតីសហរដ្ឋអាមេរិក លោក Donald Trump បានអះអាងដដែលៗថា កម្មវិធីនុយក្លេអ៊ែររបស់អ៊ីរ៉ង់ ត្រូវបាន «បំផ្លាញទាំងស្រុង»។