ការិយាល័យរបស់លោក បាននិយាយថា ប្រធានាធិបតីទួរគី លោក តាយីប អឺដូហ្កាន់ (Tayyip Erdogan) បានថ្លែងប្រាប់មេដឹកនាំនៅក្នុងកិច្ចប្រជុំកំពូលរបស់អង្គការណាតូ កាលពីថ្ងៃពុធថា បទឈប់បាញ់រវាងអ៊ីស្រាអែល និងអ៊ីរ៉ង់ ចាំបាច់ត្រូវធ្វើឡើងជាអចិន្ត្រៃយ៍ និងបានអំពាវនាវឲ្យមានបទឈប់បាញ់ នៅតំបន់ហ្កា ហ្សា ដើម្បីកាត់បន្ថយវិបត្តិមនុស្សធម៌ នៅទីនោះ។

ប្រទេសទួរគីដែលជាសមាជិកអង្គការណាតូ បានរិះគន់យ៉ាងខ្លាំងក្លាចំពោះអ៊ីស្រាអែល និងការវាយប្រហាររបស់ខ្លួន ប្រឆាំងនឹងក្រុមសកម្មប្រយុទ្ធហាម៉ាសប៉ាឡេស្ទីន នៅតំបន់ហ្កាហ្សា ដែលបានក្លាយទៅជាគំនរបាក់បែក បន្ទាប់ពីសង្គ្រាមពីរឆ្នាំ និងបានធ្វើឲ្យប្រជាជនរបស់ខ្លួន ផ្លាស់ទីលំនៅ។

ទីក្រុងអង់ការ៉ា ក៏បាននិយាយផងដែរថា៖«អំពើភេរវកម្មរដ្ឋ»របស់អ៊ីស្រាអែលប្រឆាំងនឹងអ៊ីរ៉ង់ ដែលមានព្រំដែនរួមប្រវែង៥៦០គីឡូម៉ែត្រ បានបង្កើនហានិភ័យនៃជម្លោះកាន់តែធំឡើង ហើយបានស្វាគមន៍បទឈប់បាញ់រវាងប្រទេសទាំងពីរ។

នៅក្នុងកិច្ចប្រជុំកំពូលរបស់អង្គការណាតូ នៅទីក្រុងឡាអេ លោក អឺដូហ្កាន់ បានជួបពិភាក្សាជាមួយមេដឹកនាំនៃប្រទេសបារាំង អាល្លឺម៉ង់ និងអង់គ្លេស ស្តីពីភាពតានតឹងក្នុងតំបន់ ទំនាក់ទំនងទ្វេភាគី និងទំនាក់ទំនងជាមួយសហភាពអឺរ៉ុប និងកិច្ចសហប្រតិបត្តិការឧស្សាហកម្មការពារជាតិ។ លោក អឺដូហ្កាន់ បានជួបជាមួយលោកប្រធានាធិបតីអាមេរិក ដូណាល់ ត្រាំ កាលពីល្ងាចថ្ងៃអង្គារ។

ការិយាល័យរបស់លោក អឺដូហ្កាន់ បាននិយាយបន្ទាប់ពីកិច្ចប្រជុំរបស់លោកជាមួយប្រធានាធិបតីបារាំង លោក អាម៉ានុយអែល ម៉ាក្រុង (Emmanuel Macron)ថា៖«ប្រធានាធិបតីរបស់យើង បាននិយាយថាលោកស្វាគមន៍បទឈប់បាញ់រវាងអ៊ីស្រាអែល និងអ៊ីរ៉ង់ ដែលស្ថានភាពជាក់ស្តែង ត្រូវតែប្រែទៅជាស្ងប់ស្ងាត់យូរអង្វែង តាមដែលអាចធ្វើទៅបាន។ ចំណែកវិបត្តិមនុស្សធម៌នៅហ្កាហ្សា កំពុងបន្តកាន់តែខ្លាំងឡើង ដូច្នេះបទឈប់បាញ់យូរអង្វែងមួយ ក៏ត្រូវការជាបន្ទាន់ផងដែរ»។