រដ្ឋបាលរបស់លោកប្រធានាធិបតីអាមេរិក Donald Trump កាលពីថ្ងៃពុធ (ទី២៥ ខែមិថុនា) បានរិះគន់យ៉ាងខ្លាំងៗ ចំពោះព័ត៌មាន ដែលថា អ៊ីរ៉ង់អាចនឹងបានយកសារធាតុអ៊ុយរ៉ានីញ៉ូមចម្រាញ់ហើយចេញ មុនពេលអាមេរិកទម្លាក់គ្រាប់បែក ខណៈដែលការខ្វែងគំនិតគ្នាបានកើនឡើង ជុំវិញថា តើការវាយប្រហារទាំងនេះ បានពន្យារពេលកម្មវិធីនុយក្លេអ៊ែររបស់ទីក្រុងតេអេរ៉ង់យូរប៉ុនណា។

លោក Trump ដែលប្រឹងប្រែងឲ្យទទួលបានការផ្ដល់តម្លៃ សម្រាប់ការបញ្ជាឲ្យមានវិធានការយោធា និងបន្ទាប់មកប្រកាសយ៉ាងឆាប់រហ័សនូវបទឈប់បាញ់ រវាងអ៊ីស្រាអែល និងអ៊ីរ៉ង់នោះ បានរិះគន់បកយ៉ាងក្រេវក្រោធ ចំពោះសេចក្ដីរាយការណ៍របស់បណ្ដាញសារព័ត៌មាន អំពីរបាយការណ៍សម្ងាត់មួយ ដែលបង្ហាញពីការសង្ស័យ ចំពោះទំហំនៃការខូចខាត នៅទីតាំងនុយក្លេអ៊ែរអ៊ីរ៉ង់។

សំណួរសំខាន់មួយទៀតដែលត្រូវបានលើកឡើងដោយអ្នកជំនាញ គឺថា តើប្រទេសអ៊ីរ៉ង់ដែលកំពុងត្រៀមវាយប្រហារ បានផ្លាស់ប្តូរទីតាំងសារធាតុអ៊ុយរ៉ានីញ៉ូមចម្រាញ់ហើយបានប្រហែល ៤០០គីឡូក្រាមដែរ ឬទេ ដែលឥឡូវនេះ អាចលាក់ទុកនៅកន្លែងផ្សេងទៀត ក្នុងប្រទេសដ៏ធំនេះ។

អ្នកនាំពាក្យសេតវិមាន លោកស្រី Karoline Leavitt បានប្រាប់ប្រព័ន្ធផ្សព្វផ្សាយ Fox News ថា៖ «ខ្ញុំអាចប្រាប់អ្នកបានថា សហរដ្ឋអាមេរិកមិនមានការចង្អុលបង្ហាញថា សារធាតុអ៊ុយរ៉ានីញ៉ូមចម្រាញ់ហើយ ត្រូវបានផ្លាស់ប្តូរទីតាំង មុនពេលមានការប្រហារ ដូចដែលខ្ញុំក៏បានឃើញការរាយការណ៍មិនពិតនោះផងដែរ»។ លោកស្រីបានបន្ថែមថា៖ «ចំពោះអ្វីដែលនៅលើដី ឥឡូវនេះ វាត្រូវបានកប់នៅក្រោមគំនរបាក់បែកដ៏ធំសម្បើម ដោយសារជោគជ័យនៃការវាយប្រហារកាលពីល្ងាចថ្ងៃសៅរ៍»៕