ប្រទេសអ៊ីរ៉ង់ កាលពីថ្ងៃពុធ បានចាត់ទុកការកត់សម្គាល់របស់អគ្គលេខាធិការអង្គការណាតូ (NATO) លោក Mark Rutte ទៅកាន់ប្រធានាធិបតី Donald Trump ជុំវិញការវាយប្រហាររបស់សហរដ្ឋអាមេរិកដែលផ្តោតលើទីតាំងនុយក្លេអ៊ែរសំខាន់ៗថា ជារឿង «គួរឲ្យអាម៉ាស់ គួរឲ្យស្អប់ខ្ពើម និងគ្មានការទទួលខុសត្រូវ»

គួរបញ្ជាក់ថា លោក Rutte បានសាទរនៅក្នុងកំណត់ត្រាមុនកិច្ចប្រជុំរបស់អង្គការណាតូទៅកាន់លោក Trump នូវអ្វីដែលលោកហៅថា «វិធានការច្បាស់លាស់» របស់លោក នៅក្នុងប្រទេសអ៊ីរ៉ង់ ពោលគឺប៉ុន្មានថ្ងៃ បន្ទាប់ពីសហរដ្ឋអាមេរិកបានបើកការវាយប្រហារមិនធ្លាប់មានពីមុនលើរោងចក្រនុយក្លេអ៊ែររបស់ទីក្រុងតេអេរ៉ង់។

លោក Rutte បានសង្កត់ធ្ងន់ថា៖ «ចំណាត់ការនេះ គឺពិតជាអស្ចារ្យណាស់ និងជាអ្វីដែលមិនមាននរណាម្នាក់ហ៊ានធ្វើឡើយ។ វាធ្វើឲ្យយើងកាន់តែមានសុវត្ថិភាពជាងមុន»។

អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baqaei បានរិះគន់ធ្ងន់ៗ ដោយនិយាយថា វាជារឿង «គួរឲ្យអាម៉ាស់ គួរឲ្យស្អប់ខ្ពើម និងគ្មានការទទួលខុសត្រូវ សម្រាប់អគ្គលេខាធិការរបស់អង្គការណាតូ ដែលបាននិយាយអបអរសាទរ ចំពោះទង្វើឧក្រិដ្ឋធ្ងន់ធ្ងរនេះ ដែលឈ្លានពានលើរដ្ឋអធិបតេយ្យមួយ»។ លោក Baqaei បានបង្ហោះនៅលើបណ្ដាញសង្គម X ថា អ្នកណាក៏ដោយដែលគាំទ្រឧក្រិដ្ឋកម្ម ត្រូវបានចាត់ទុកថា ជាបុគ្គលមិនគោរពច្បាប់។

កាលពីថ្ងៃអាទិត្យចុងសប្ដាហ៍កន្លងទៅ សហរដ្ឋអាមេរិកបានវាយប្រហារលើទីតាំងសំខាន់ៗនៃទីក្រុង Fordo, Isfahan និង Natanz ហើយវិធានការនេះ បានកើតឡើងក្រោយរយៈពេល ១០ថ្ងៃបន្ទាប់ពីអ៊ីស្រាអែលបានចាប់ផ្តើមយុទ្ធនាការទម្លាក់គ្រាប់បែកទ្រង់ទ្រាយធំលើប្រទេសអ៊ីរ៉ង់៕