បើយោងតាមសារព័ត៌មាន The Telegraph លោកនាយករដ្ឋមន្ត្រីអង់គ្លេស លោក Keir Starmer បាននិយាយថា រុស្ស៊ីកំពុងអូសបន្លាយពេល ដើម្បីបញ្ចៀសការបញ្ចប់សង្រ្គាម នៅអ៊ុយក្រែន ដូច្នេះ ចាំបាច់ត្រូវដាក់សម្ពាធលើប្រធានាធិបតីរុស្ស៊ី លោក Vladimir Putin។ 

ក្នុងអំឡុងសុន្ទរកថារបស់លោក នៅឯកិច្ចប្រជុំកំពូលរបស់អង្គការណាតូ នៅទីក្រុងឡាអេ ប្រទេសហូឡង់ លោក Starmer បាននិយាយថា ឥឡូវនេះ គឺជាពេលវេលា ដែលត្រូវបង្ខំលោក Putin ឲ្យយល់ព្រមលើបទឈប់បាញ់ នៅអ៊ុយក្រែន។ លោកនាយករដ្ឋមន្រ្តី បានកត់សម្គាល់ថា លោក Putin កំពុងអូសបន្លាយពេលឲ្យកាន់តែយូរ ហើយបានបន្ថែមថា ដល់ពេលដែលត្រូវ «ចាត់វិធានការបញ្ចប់ជម្លោះនេះ» ជាបន្ទាន់។

លោកបានសង្កត់ធ្ងន់ថា៖«ជាការពិតណាស់ ក្នុងរយៈពេល ២-៣ថ្ងៃចុងក្រោយនេះ ខ្ញុំនឹងនិយាយថា ការពិភាក្សារបស់ខ្ញុំជាមួយថ្នាក់ដឹកនាំទាំងអស់ គឺមានការដោះស្រាយយ៉ាងពិតប្រាកដ»។ លោក Starmer ក៏បានចង្អុលបង្ហាញដែរថា៖ «ឥឡូវនេះ គឺជាពេលវេលាដែលត្រូវជំរុញម្តងទៀត ដើម្បីឲ្យលោក Putin ទៅកាន់តុចរចា សម្រាប់បទឈប់បាញ់ដោយគ្មានលក្ខខណ្ឌ»។

លោកនាយករដ្ឋមន្ត្រីអង់គ្លេស បានសន្និដ្ឋានថា៖ «លោកប្រធានាធិបតី Zelenskyy មានរយៈពេលជាច្រើនសប្តាហ៍មកហើយដែលបង្ហាញពីឆន្ទៈរបស់ខ្លួន ក្នុងការស្វែងរកបទឈប់បាញ់ដោយគ្មានលក្ខខណ្ឌ។ ឥឡូវនេះ គឺជាពេលដែលលោក Putin ដែលបាននិងកំពុងពន្យារពេលនោះ ត្រូវចូលតុចរចាហើយ»។ 

កិច្ចប្រជុំកំពូលប្រចាំឆ្នាំរបស់អង្គការណាតូ បានប្រព្រឹត្តទៅនៅថ្ងៃទី ២៤-២៥ ខែមិថុនា នៅទីក្រុងឡាអេ ប្រទេសហូឡង់។ ប្រធានបទសំខាន់ គឺការបង្កើនការចំណាយលើវិស័យការពារជាតិ ជាមួយនឹងការពិភាក្សាផ្តោតលើការកំណត់គោលដៅ ៥% នៃផលិតផលក្នុងស្រុកសរុប (GDP) នៅឆ្នាំ២០២៥។ ទោះជាយ៉ាងណាក៏ដោយ សម្ព័ន្ធមិត្តទាំងអស់ ក៏កំពុងពិភាក្សាអំពីការគាំទ្រសម្រាប់អ៊ុយក្រែនផងដែរ៕