រដ្ឋមន្ត្រីការពារជាតិរបស់ប្រទេសបារាំង លោក Sebastien Lecornu កាលពីយប់ថ្ងៃពុធ (ទី២៥ ខែមិថុនា) បាននិយាយថា យោធារបស់ប្រទេសបារាំងបានចូលរួមក្នុងកិច្ចប្រឹងប្រែងរារាំងយានដ្រូនរបស់អ៊ីរ៉ង់ ដែលសំដៅទៅប្រទេសអ៊ីស្រាអែល មុនពេលមានបទឈប់បាញ់ ក្នុងសប្តាហ៍នេះ។

ក្នុងកិច្ចពិភាក្សាសភា ស្តីពីស្ថានភាព នៅតំបន់មជ្ឈិមបូព៌ា លោក Lecornu បាននិយាយថា៖ «ខ្ញុំអាចបញ្ជាក់ថា កងទ័ពបារាំងបានស្ទាក់ចាប់យានដ្រូនតិចជាង ១០គ្រឿង នៅប៉ុន្មានថ្ងៃចុងក្រោយ ក្នុងអំឡុងពេលមានប្រតិបត្តិការយោធាផ្សេងៗគ្នា ដែលធ្វើឡើងដោយសាធារណរដ្ឋឥស្លាមអ៊ីរ៉ង់ ប្រឆាំងនឹងអ៊ីស្រាអែល ដោយការរារាំងនោះមានទាំងពីប្រព័ន្ធបាញ់ពីដីទៅអាកាស ឬតាមរយៈយន្តហោះចម្បាំង Rafale របស់យើង»។

លោក Lecornu បានបញ្ជាក់ថា អ៊ីរ៉ង់បានបាញ់មីស៊ីលបាលីស្ទិកប្រមាណ ៤០០គ្រាប់ និងបាញ់បង្ហោះយានដ្រូនចំនួន ១.០០០គ្រឿង សំដៅទៅកាន់ប្រទេសអ៊ីស្រាអែល ក្នុងអំឡុងពេលមានជម្លោះរយៈពេល ១២ថ្ងៃ។

សូមបញ្ជាក់ថា អ៊ីស្រាអែលបានចាប់ផ្តើមបើកការវាយប្រហារលើអ៊ីរ៉ង់ កាលពីថ្ងៃទី១៣ ខែមិថុនា ដោយផ្ដល់ហេតុផលថា ខ្លួនមានគោលបំណងបំផ្លាញសមត្ថភាពនុយក្លេអ៊ែររបស់គូសត្រូវមួយនេះ។ អ៊ីស្រាអែល បានប្រាប់ថា ការវាយប្រហាររបស់ខ្លួនបានបំផ្លាញទីបញ្ជាការយោធាជាន់ខ្ពស់របស់អ៊ីរ៉ង់ និងបានសម្លាប់អ្នកវិទ្យាសាស្ត្រនុយក្លេអ៊ែរជាច្រើននាក់។ អាជ្ញាធរអ៊ីរ៉ង់ បាននិយាយថា មនុស្ស ៦១០នាក់ បានបាត់បង់ជីវិត ហើយជិត ៥.០០០នាក់ បានរងរបួសនៅក្នុងប្រទេស ។

ការបាញ់មីស៊ីលសងសឹករបស់ទីក្រុងតេអេរ៉ង់ បានបណ្ដាលឲ្យមានអ្នកស្លាប់យ៉ាងហោចណាស់ ២៨នាក់ ក្នុងប្រទេសអ៊ីស្រាអែល និងបានបំផ្លិចបំផ្លាញអគាររាប់រយខ្នង រហូតដល់បទឈប់បាញ់ចូលជាធរមាននៅថ្ងៃអង្គារ (ទី២៤ ខែមិថុនា)៕