ប្រធានាធិបតីទួរគី លោក Tayyip Erdogan បាននិយាយថា សមភាគីអាមេរិករបស់លោក គឺលោក Donald Trump បានប្រាប់លោកថា នឹងចូលរួមកិច្ចចរចាសន្តិភាពដែលអាចកើតមាន រវាងមេដឹកនាំអ៊ុយក្រែន និងរុស្ស៊ី នៅក្នុងប្រទេសទួរគី ប្រសិនបើប្រធានាធិបតីរុស្ស៊ី លោក Vladimir Putin ក៏ព្រមព្រៀងបង្ហាញវត្តមានដែរ។

ក្នុងដំណើរត្រលប់ពីកិច្ចប្រជុំកំពូលរបស់អង្គការណាតូ (NATO) ជាកន្លែងដែលលោកបានជួបលោក Trump ជាលើកដំបូង គិតចាប់តាំងពីលោកបានចូលកាន់តំណែងវិញ លោក Erdogan បានបញ្ជាក់ថា លោកបានប្រាប់ប្រធានាធិបតីអាមេរិកថា ទីក្រុងអង់ការ៉ា មានបំណងធ្វើយ៉ាងណាឲ្យទាំងមេដឹកនាំរុស្ស៊ី និងអ៊ុយក្រែនទៅអង្គុយទល់មុខគ្នានៅក្នុងប្រទេសទួរគី សម្រាប់កិច្ចចរចាសន្តិភាព។

នៅថ្ងៃព្រហស្បតិ៍ (ទី២៦ ខែមិថុនា) នេះ ការិយាល័យរបស់លោក Erdogan បានដកស្រង់សម្ដីរបស់លោកដែលបានប្រាប់អ្នកសារព័ត៌មានថា៖ «គាត់ (លោក Trump) បាននិយាយថា ប្រសិនបើប្រធានាធិបតីរុស្ស៊ីលោក Vladimir Putin ទៅទីក្រុងអ៊ីស្តង់ប៊ុល ឬទីក្រុងអង់ការ៉ា ដើម្បីពិភាក្សារកដំណោះស្រាយនោះ ខ្ញុំនឹងទៅដូចគ្នាដែរ»។

លោកបានបន្ថែមថា៖ «យើងនឹងរៀបចំការទាក់ទងចាំបាច់ ហើយសង្ឃឹមថា យើងនឹងមានកិច្ចជុំនេះឲ្យបានឆាប់តាមដែលអាចធ្វើទៅបាន»៕