ឯកអគ្គរដ្ឋទូតអ៊ីរ៉ង់ប្រចាំនៅប្រទេសម៉ាឡេស៊ី លោក Valiollah Mohammadi Nasrabadi បាននិយាយថា ផ្លូវពាណិជ្ជកម្មឆ្លងកាត់ច្រកសមុទ្រ Hormuz នឹងនៅតែបើកចំហដដែល ហើយមិនរងផលប៉ះពាល់អ្វីឡើយ ខណៈដែលអ៊ីរ៉ង់ប្រឹងប្រែងពង្រឹងទំនាក់ទំនងសេដ្ឋកិច្ចរបស់ខ្លួនជាមួយម៉ាឡេស៊ី និងបណ្តាប្រទេសនានា ក្នុងសមាគមប្រជាជាតិអាស៊ីអាគ្នេយ៍ (អាស៊ាន)។

បើតាមសេចក្ដីរាយការណ៍របស់សារព័ត៌មាន Sinar Harian បានឲ្យដឹងថា លោក Valiollah បាននិយាយថា ការធានារបស់អ៊ីរ៉ង់ ទោះបីជាបន្តមានជម្លោះជាមួយអ៊ីស្រាអែលក៏ដោយ គឺដើម្បីការពារពាណិជ្ជកម្មអន្តរជាតិ និងផលប្រយោជន៍សេដ្ឋកិច្ចនៃប្រទេសអាស៊ីអាគ្នេយ៍ ដូចជាម៉ាឡេស៊ីជាដើម។ លោកក៏បានលើកឡើងផងដែរថា បច្ចុប្បន្នអ៊ីរ៉ង់មិនមានបំណងចង់បិទផ្លូវពាណិជ្ជកម្មសំខាន់នេះនោះទេ ហើយនឹងបន្តរក្សាសន្តិសុខ សម្រាប់ច្រកសមុទ្រនេះ។

អំឡុងសន្និសីទសារព័ត៌មាន នៅថ្ងៃព្រហស្បតី (ទី២៦ ខែមិថុនា) នេះ លោកបានបញ្ជាក់ថា៖ «អ៊ីរ៉ង់មិនបានរឹតបន្តឹងផ្លូវពាណិជ្ជកម្មណាមួយនោះឡើយ ហើយយើងចង់ឲ្យតំបន់នេះនៅតែបើកចំហ សម្រាប់កិច្ចសហប្រតិបត្តិការពាណិជ្ជកម្ម និងសេដ្ឋកិច្ចជាមួយប្រទេសជិតខាង ក៏ដូចជាដៃគូខាងក្រៅ ដូចជាម៉ាឡេស៊ីជាដើម»។

ជាមួយគ្នានេះ លោកបានបន្ថែមថា នាយករដ្ឋមន្ត្រីម៉ាឡេស៊ី លោក Anwar Ibrahim និងប្រធានាធិបតីអ៊ីរ៉ង់ លោក Masoud Pezeshkian នាពេលថ្មីៗនេះ បានពិភាក្សាគ្នា ដើម្បីធានាឲ្យបានសន្តិភាព ក្នុងតំបន់ និងបង្កើតក្របខ័ណ្ឌ សម្រាប់កិច្ចសហប្រតិបត្តិការពាណិជ្ជកម្ម រវាងម៉ាឡេស៊ី និងអ៊ីរ៉ង់។

ហើយចុងក្រោយ លោក Valiollah ក៏បានសម្តែងការដឹងគុណ ចំពោះម៉ាឡេស៊ី ដែលបានគាំទ្រអ៊ីរ៉ង់ប្រឆាំងនឹងវិធានការយោធានាពេលថ្មីៗនេះរបស់អ៊ីស្រាអែលលើទីក្រុងតេអេរ៉ង់។

កាលពីថ្ងៃទី២២ ខែមិថុនា សភាអ៊ីរ៉ង់បានអនុម័តវិធានការបិទច្រកសមុទ្រ Hormuz ជាការឆ្លើយតបនឹងការវាយប្រហារតាមអាកាសរបស់អាមេរិកលើទីតាំងនុយក្លេអ៊ែរធំៗចំនួន ៣ របស់អ៊ីរ៉ង់៕