នាយករដ្ឋមន្ត្រីអេស្ប៉ាញ លោក Pedro Sanchez នៅថ្ងៃព្រហស្បតិ៍ (ទី២៦ ខែមិថុនា) នេះ បាននិយាយថា តំបន់ហ្កាហ្សា កំពុងស្ថិតក្នុង «ស្ថានភាពមហន្តរាយនៃអំពើប្រល័យពូជសាសន៍» ហើយបានជំរុញឲ្យសហភាពអឺរ៉ុប (EU) ផ្អាកជាបន្ទាន់នូវកិច្ចព្រមព្រៀងសហប្រតិបត្តិការជាមួយអ៊ីស្រាអែល។

ការលើកឡើងនេះបង្ហាញពីការថ្កោលទោសខ្លាំងបំផុត រហូតមកដល់ពេលបច្ចុប្បន្ននេះ ដោយមេដឹកនាំនៃគណបក្សសង្គមនិយម ដែលជាអ្នករិះគន់ដោយបើកចំហ ចំពោះការវាយលុករបស់អ៊ីស្រាអែល នៅតំបន់ហ្កាហ្សាដែលបង្កឡើងដោយការវាយប្រហាររបស់ក្រុមហាម៉ាសលើអ៊ីស្រាអែល កាលពីឆ្នាំ២០២៣។

អំឡុងពេលនិយាយទៅកាន់អ្នកសារព័ត៌មាន នៅមុនកិច្ចប្រជុំកំពូលរបស់ EU នៅទីក្រុងប្រ៊ុចសែល ប្រទេសបែលហ្ស៊ិក លោក Sanchez បានលើកឡើងពីរបាយការណ៍សិទ្ធិមនុស្សនាពេលថ្មីៗនេះរបស់ទីភ្នាក់ងារការទូតរបស់ប្លុកនេះ ដែលលោកបាននិយាយថា «ស្ថានភាពមហន្តរាយនៃអំពើប្រល័យពូជសាសន៍ កំពុងកើតឡើងនៅតំបន់ហ្កាហ្សា»។

គួរបញ្ជាក់ថា របាយការណ៍ដែលបានចេញផ្សាយកាលពីសប្តាហ៍មុន បានរកឃើញនូវ «ភស្តុតាង» ដែលបង្ហាញថា អ៊ីស្រាអែលកំពុងរំលោភលើកាតព្វកិច្ចសិទ្ធិមនុស្សរបស់ខ្លួន ក្រោមកិច្ចព្រមព្រៀងដែលបង្កើតជាមូលដ្ឋាន សម្រាប់ទំនាក់ទំនងពាណិជ្ជកម្ម។

របាយការណ៍នោះបានលើកឡើងពីការរាំងខ្ទប់ជំនួយមនុស្សធម៌របស់អ៊ីស្រាអែល សម្រាប់ដែនដីប៉ាឡេស្ទីន ចំនួនស្លាប់ និងរបួសដ៏ច្រើននៃជនស៊ីវិល ការវាយប្រហារលើអ្នកសារព័ត៌មាន និងការបម្លាស់ទីលំនៅ និងការបំផ្លិចបំផ្លាញយ៉ាងធំធេងដែលបណ្តាលមកពីសង្រ្គាម។

ហើយលោក Sanchez បាននិយាយថា វាគឺ «ហួសពីជាក់ស្តែងណាស់» ដែលអ៊ីស្រាអែលកំពុងរំលោភលើកាតព្វកិច្ចរបស់ខ្លួន ហើយថា ប្លុកគួរតែផ្អាកកិច្ចព្រមព្រៀងសហប្រតិបត្តិការ «ភ្លាមៗ»៕