ប្រភពពីមន្ទីរពេទ្យចំនួន ២ បានប្រាប់ឲ្យដឹងថា សិស្សយ៉ាងហោចណាស់ ២៩នាក់ បានបាត់បង់ជីវិត នៅពេលដែលការផ្ទុះឧបករណ៍ចែកចាយអគ្គិសនីបង្កឲ្យមានការភ័យស្លន់ស្លោ និងការប្រជ្រៀតជាន់គ្នា នៅសាលាវិទ្យាល័យមួយកន្លែងក្នុងរដ្ឋធានីនៃសាធារណរដ្ឋអាហ្វ្រិកកណ្តាល កាលពីថ្ងៃពុធ (ទី២៥ ខែមិថុនា)។

ក្រសួងអប់រំបានឲ្យដឹងថា គ្រោះមហន្តរាយនេះបានកើតឡើងនៅពេលដែលសិស្សជាង ៥.០០០នាក់ មកពីសាលាចំនួន ៦ ផ្សេងទៀត កំពុងធ្វើការប្រឡងចុងក្រោយរបស់ពួកគេ នៅឯមណ្ឌលប្រឡងដែលមានទីតាំងនៅវិទ្យាល័យ Barthelemy Boganda ក្នុងទីក្រុង Bangui។

ប្រភពមួយពីមន្ទីរពេទ្យ បានប្រាប់សារព័ត៌មាន Reuters ថា មានអ្នកស្លាប់ ២៩នាក់ ហើយ ២៦០នាក់រងរបួស។ ដោយប្រាប់ពីការតានតឹងអារម្មណ៍របស់ក្រុមលោក ប្រភពនោះបាននិយាយថា៖ «ពួកយើងពិតជាមានការភ្ញាក់ផ្អើលខ្លាំងណាស់។ វាពិតជាគួរឲ្យតក់ស្លុតមែនទែន។ ជនរងគ្រោះរាប់សិបនាក់បានមកដល់មន្ទីរពេទ្យ»។

ចំណែកប្រភពពីមន្ទីពេទ្យមួយផ្សេងទៀតដែលដាក់ចំនួនអ្នកស្លាប់ ៣១នាក់ បាននិយាយថា សំឡេងផ្ទុះនោះ បានធ្វើឲ្យសិស្សគិតថា អគារនឹងដួលរលំ។ លោកបានប្រាប់សារព័ត៌មាន Reuters ថា «មានការភ័យស្លន់ស្លោ ហើយសិស្សមួយចំនួន បានលោតពីជាន់ទី១» ដោយលោកបានបន្ថែមថា អ្នកប្រឡងមានអាយុចន្លោះប្រហែល ១៨-២២ឆ្នាំ។

ក្រសួងអប់រំបានឲ្យដឹងនៅក្នុងសេចក្តីថ្លែងការណ៍មួយថា ឧបករណ៍ចែកចាយអគ្គិសនីដែលមានទីតាំងនៅអគារធំរបស់សាលារៀន បានផ្ទុះបន្ទាប់ពីក្រុមមកពីប្រតិបត្តិករផ្ដល់អគ្គិសនីរបស់ប្រទេស ENERCA បានជួសជុលស្តារចរន្តអគ្គិសនីឡើងវិញ៕