ការវាយប្រហារកាលពីថ្ងៃពុធ ដោយក្រុមតាំងលំនៅនិគមន៍អ៊ីស្រាអែលលើទីក្រុងនៅតំបន់វ៉េសប៊ែង បង្កឲ្យមានការប្រឈមដាក់គ្នាដែលបានបញ្ចប់ទៅដោយកងកម្លាំងអ៊ីស្រាអែល បាញ់សម្លាប់ជនប៉ាឡេស្ទីន ៣នាក់ ។ នេះបើយោងតាមការអះអាងរបស់យោធាអ៊ីស្រាអែល និងអាជ្ញាធរប៉ាឡេស្ទីន បានឲ្យដឹងនៅថ្ងៃព្រហស្បតិ៍នេះ ។

រូបភាពវីដេអូឃ្លីប ឃើញជនរងគ្រោះត្រូវបាននាំទៅកាន់មន្ទីរពេទ្យបង្អែក ក្រោយឧបទ្ទវហេតុកើតឡើង ។

ក្រសួងសុខាភិបាលប៉ាឡេស្ទីន និយាយថា មនុស្ស ៧នាក់ផ្សេងទៀត បានរងរបួស នៅក្នុងអំពើហិង្សានេះ ដែលបានកើតឡើងនៅទីក្រុង Kafr Malik ស្ថិតនៅភាគឦសានទីក្រុង Kafr Malik ។

សេចក្តីថ្លែងការណ៍របស់យោធាអ៊ីស្រាអែល និយាយថា អ្នកតាំងលំនៅនិគមន៍អ៊ីស្រាអែលរាប់សិបនាក់ បានដុតទ្រព្យសម្បត្តិជាអគ្គិភ័យឡើង ។

ពួកគេបានបញ្ជូនមន្រ្តីយោធា និងកងកម្លាំងនគរបាលទៅកាន់កន្លែងកើតហេតុ ក្រោយទទួលបានសេចក្តីរាយការណ៍ថា អំពើហិង្សាបានផ្ទុះឡើង រួមទាំងការចោលដុំថ្មលើគ្នាទៅវិញទៅមកផងដែរ ។

យោធាអ៊ីស្រាអែល និយាយថា ជនប៉ាឡេស្ទីនជាច្រើននាក់ បានបើកការបាញ់ប្រហារ ហើយនិងការចោលដុំថ្មលើកងកម្លាំងសមត្ថិកិច្ច ដែលបានតបតវិញជាមួយនឹងការបាញ់ប្រហារ ។

មន្រ្តីកងទ័ពអ៊ីស្រាអែលមួយរូប បានរងរបួសស្រាល ហើយជនសង្ស័យអ៊ីស្រាអែល ៥នាក់ ត្រូវបានចាប់ខ្លួន ។

សូមបញ្ជាក់ថា សកម្មភាពតាំងលំនៅក្នុងតំបន់វ៉េសប៊ែងមានការកើនឡើងយ៉ាងឆាប់រហ័ស ចាប់តាំងពីផ្ទុះសង្រ្គាមរបស់ក្រុមហាម៉ាស និងអ៊ីស្រាអែល នៅតំបន់ហ្គហ្សា ។

អ៊ីស្រាអែល បានបង្កើនប្រតិបត្តិការយោធារបស់ពួកគេប្រឆាំងក្រុមជីវពលប៉ាឡេស្ទីននៅតំបន់វ៉េសប៊ែង និងការវាយប្រហាររបស់ក្រុមតាំងលំនៅនិគមន៍អ៊ីស្រាអែល លើពលរដ្ឋប៉ាឡេស្ទីន ក៏បានកើនឡើងផងដែរ ៕