រដ្ឋមន្ត្រីការពារជាតិអាមេរិក លោក Pete Hegseth បានទទូចកាលពីថ្ងៃព្រហស្បតិ៍២៦ ខែមិថុនា ថា ការវាយប្រហាររបស់អាមេរិកលើទីតាំងនុយក្លេអ៊ែរអ៊ីរ៉ង់គឺជាជោគជ័យ ដោយគាំទ្រការអះអាងរបស់ប្រធានាធិបតី Donald Trump និងបានស្តីបន្ទោសប្រព័ន្ធផ្សព្វផ្សាយសម្រាប់ការចោទសួរលទ្ធផលនៃប្រតិបត្តិការរបស់ខ្លួន។

យន្តហោះទម្លាក់គ្រាប់បែក B-2 របស់អាមេរិកបានវាយប្រហារទីតាំងនុយក្លេអ៊ែរអ៊ីរ៉ង់ចំនួនពីរដោយប្រើគ្រាប់បែកខួងចូលក្នុងគោលដៅក្រោមដីរួចបំផ្ទុះកម្ទេច GBU-57 ដ៏ធំកាលពីចុងសប្តាហ៍មុន         ខណៈនាវាមុជទឹកបំពាក់មីស៊ីលនាំផ្លូវបានវាយប្រហារទីតាំងទីបីដោយប្រើមីស៊ីលតម្រង់គោលដៅ Tomahawk ។     

លោក Hegseth បានប្រាប់អ្នកសារព័ត៌មាននៅមន្ទីរបញ្ចកោណ ដោយសំដៅទៅលើជម្លោះរយៈពេល ១២ ថ្ងៃរវាងអ៊ីស្រាអែល និងអ៊ីរ៉ង់ថា លោកប្រធានាធិបតី Trump បានបង្កើតលក្ខខណ្ឌដើម្បីបញ្ចប់សង្រ្គាម និងគោលដៅកម្ទេចសមត្ថភាពនុយក្លេអ៊ែររបស់អ៊ីរ៉ង់។

លោក Trump បានហៅការវាយប្រហារនេះថាជា "ជោគជ័យខាងយោធាដ៏អស្ចារ្យ" ហើយបាននិយាយម្តងហើយម្តងទៀតថាការវាយប្រហារទាំងនោះបានបំផ្លាញទីតាំងនុយក្លេអ៊ែរ។

កាលពីថ្ងៃព្រហស្បត្តិ៍ លោកបានទទូចថា អ៊ីរ៉ង់ពុំបានដឹកជញ្ជូនឬផ្លាស់ទីចេញនូវសម្ភារនុយក្លេអ៊ែរ រួមទាំងសារធាតុអ៊ុយរ៉ានីញ៉ូមដែលចម្រាញ់រួចនោះទេ មុនមានសកម្មភាពយោធារបស់សហរដ្ឋអាមេរិក។

លោកTrump បាននិយាយក្នុងការប្រកាសលើវេទិកាសង្គម Truth របស់លោកថា គ្មានអ្វីត្រូវបានយកចេញពីកន្លែងនោះទេ។ វានឹងចំណាយពេលយូរខ្លាំងណាស់និង គ្រោះថ្នាក់ពេកដែរ ពិតជាពិបាកណាស់ក្នុងការដឹកជញ្ជូនចេញនោះ។ មានការលើកឡើងថា ពិភពលោក កំពុងប្រកែកគ្នាពីការខូចខាតទីតាំងនុយក្លេអ៊ែររបស់អ៊ីរ៉ង់នឹងលើកជាសំណួរថា តើសារធាតុអ៊យរ៉ានីញ៉ូម ត្រូវបានចម្រាញ់រួចនោះនៅកន្លែងណា៕