អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) ត្រៀមស្ដាប់ការកាត់ទោសពីបទប្រមាថព្រះមហាក្សត្រនៅសប្តាហ៍ក្រោយ ដោយប្រទេសនេះកំពុងរួមរឹតដោយភាពចលាចលនយោបាយដ៏វឹកវរ ភាពចម្រូងចម្រាស និងជម្លោះផ្ទៃក្នុងដ៏បែកបាក់ ខណៈកូនស្រីរបស់លោកគឺលោកស្រី ផែថងថាន ស៊ីណាវ៉ាត់ (Paetongtarn Shinawatra) ក៏កំពុងប្រឈមមុខនឹងការបណ្តេញចេញពីតំណែងជានាយករដ្ឋមន្ត្រីថៃ ដោយតុលាការធម្មនុញ្ញនៅថ្ងៃទី០១ ខែកក្កដា ស្របពេលដែលសកម្មជនគំរាមតវ៉ាទ្រង់ទ្រាយធំនៅទីក្រុងបាងកក។

សេដ្ឋកិច្ចធំបំផុតទីពីររបស់អាស៊ីអាគ្នេយ៍មួយនេះ ត្រៀមខ្លួនទប់ទល់សម្រាប់ជុំថ្មីនៃភាពចលាចលក្នុងសង្គម និងអស្ថិរភាពនយោបាយ ដែលតែងគ្រប់ដណ្ដប់ប្រទេសថៃក្នុងរយៈពេលពីរទសវត្សរ៍ចុងក្រោយនេះ ខណៈកងកម្លាំងអភិរក្សនិយមបន្តការប៉ះទង្គិចដ៏យូរអង្វែងរបស់ពួកគេជាមួយក្រុមគ្រួសារត្រកូល ស៊ីណាវ៉ាត់ ដែលកំពុងប្រឈមមុខនឹងវិបត្តិដ៏ធំ។

ប៉ុន្មានសប្តាហ៍ខាងមុខនឹងមើលឃើញសវនាការជាបន្តបន្ទាប់របស់តុលាការ ដែលអាចបញ្ចប់អាជីពនយោបាយរយៈពេលខ្លីរបស់នាយករដ្ឋមន្ត្រីថៃ លោកស្រី Paetongtarn ស្របពេលរដ្ឋាភិបាលប្រទេសនេះកំពុងជួបភាពមិនច្បាស់លាស់ ហើយក៏អាចមើលឃើញការបញ្ជូនឪពុកមហាសេដ្ឋីវ័យ ៧៥ឆ្នាំ របស់លោកស្រី ឱ្យជាប់ពន្ធធានាគារផងដែរ។

រឿងរ៉ាវដ៏ច្របូលច្របល់នេះកើតឡើងស្របពេលប្រទេសថៃ ដែលពឹងផ្អែកខ្លាំងលើអ្នកទេសចរ កំពុងស្វះស្វែងរកការស្តារសេដ្ឋកិច្ចដែលកំពុងអន់ថយរបស់ខ្លួនឡើងវិញ ដោយប្រឹងប្រែងកំពុងឆ្ពោះទៅរកការដកពន្ធពាណិជ្ជកម្មដ៏ខ្ពស់សហរដ្ឋអាមេរិក៕