ក្រុមអ្នកពន្លត់អគ្គិភ័យនៅប្រទេសក្រិកកាលពីថ្ងៃព្រហស្បតិ៍ បានប្រយុទ្ធទប់ស្កាត់ចំហេះព្រៃដែលបានឆាបឆេះលំនៅឋាននិងផ្ទះលំហែរនៅជិតទីក្រុងឆ្នេរ Palaia Fokaia ដែលមានចម្ងាយ៤០គីឡូម៉ែត្រ ភាគខាងត្បូងទីក្រុង Athens ដោយបង្ខំឲ្យមនុស្សជាច្រើនត្រូវភៀសខ្លួនចេញ។

ចំហេះព្រៃបានឆាបឆេះពេញមួយសប្តាហ៍នៅក្នុងប្រទេសក្រិក នៅតំបន់ភាគខាងត្បូងផុត ជាកន្លែងដែលអគ្គិភ័យតែងឆេះព្រៃជាញឹកញាប់និងកើតមានទឹកជំនន់ក្នុងរយៈពេលប៉ុន្មានឆ្នាំចុងក្រោយនេះ ដែលបានធ្វើឱ្យកាន់តែធ្ងន់ធ្ងរឡើងដោយសារតែបម្រែបម្រួលអាកាសធាតុ។

នៅក្នុងតំបន់ Palaia Fokaia ក្រុមអ្នកពន្លត់អគ្គិភ័យចំនួន១៣០នាក់ ត្រូវបានគាំទ្រដោយយន្តហោះចំនួន១២គ្រឿង និងឧទ្ធម្ភាគចក្រចំនួន១២គ្រឿង ខណៈពួកគេព្យាយាមពន្លត់អណ្តាតភ្លើងឆាបឆេះ ដែលបានឆេះរាលដាលដោយខ្យល់បក់ខ្លាំង។

អ្នកនាំពាក្យក្រុមពន្លត់អគ្គិភ័យ បាននិយាយក្នុងសន្និសីទសារព័ត៌មានតាមទូរទស្សន៍ថា នគរបាលប្រទេសក្រិក បានជម្លៀសមនុស្ស៤០នាក់ទៅកាន់ទីសុវត្ថិភាព ហើយនាវាឆ្មាំល្បាតឆ្នេរ បានធ្វើដំណើរទៅកាន់តំបន់រងគ្រោះ ដើម្បីជួយជម្លៀសមនុស្សបន្ថែមទៀតប្រសិនបើចាំបាច់។

អាជ្ញាធរនិយាយថា ហានិភ័យនៃចំហេះព្រៃ នៅតែមានកម្រិតខ្ពស់នៅថ្ងៃសុក្រនេះ មុនពេលអាកាសធាតុចុះត្រជាក់វិញ។

ប្រទេសក្រិក បានចំណាយប្រាក់រាប់រយលានអឺរ៉ូដើម្បីផ្តល់សំណងដល់គ្រួសារ និងកសិករជាច្រើន សម្រាប់ការខូចខាតទាក់ទងនឹងអាកាសធាតុធ្ងន់ធ្ងរ និងដើម្បីទទួលបានឧបករណ៍ពន្លត់អគ្គិភ័យថ្មីនិងទំនើប ក្នុងការដោះស្រាយចំហេះព្រៃ ដែលពិបាកក្នុងការទប់ស្កាត់ដោយការកើនឡើងសីតុណ្ហភាពនៅរដូវក្តៅ។