ក្នុងឱកាសអញ្ជើញសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ/សង្កាត់ ក្នុងខេត្តព្រះវិហារនៅព្រឹកនេះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា បានសម្ដែងការសោកស្ដាយចំពោះទំនាក់ទំនង មិត្តភាព៣០ឆ្នាំរវាងសម្ដេច ជាមួយគ្រួសារអតីតនាយករដ្ឋមន្រ្ដីថៃ ថាក់ស៊ីន ស៊ីណាវ៉ាត់ត្រា ដែលត្រូវបំផ្លាញដោយកូនស្រីរបស់លោក គឺលោកស្រី ផែថនថាន ស៊ីណាវ៉ាត្រ នាយករដ្ឋមន្រ្ដីបច្ចុប្បន្នកូនស្រីរបស់លោក ថាក់ស៊ីន ដែលជាមនុស្សគ្មានភាពស្មោះត្រង់ចំពោះព្រះមហាក្សត្រ ប្រជាពលរដ្ឋថៃខ្លួនឯងផង និងគ្មានភាពស្មោះត្រង់ចំពោះគ្រួសារសម្ដេចតេជោដែលជាមិត្តចាស់ផង។

ក្នុងឱកាសនោះ សម្ដេចតេជោ ហ៊ុន សែន បានអះអាងថា សម្ដេចធ្លាប់បានជួយសង្គ្រោះគ្រួសារលោក ថាក់ស៊ីន ច្រើនណាស់ រាប់ទាំងការផ្ដល់គំនិតយោបល់។ ជាមួយគ្នានេះ សម្ដេច ក៏បានបង្ហើបពីការជួយសង្គ្រោះលោកស្រី យីងឡាក់ ស៊ីណាវ៉ាត់ត្រា អតីតនាយករដ្ឋមន្រ្តីថៃ ដែលរងការចាប់ខ្លួនពីក្រុមយោធា ក្រោយការធ្វើរដ្ឋប្រហារទម្លាក់តំណែង កាលពីឆ្នាំ២០១៤ទៀតផង។ បើតាមសម្ដេចតេជោ ហ៊ុន សែន កម្ពុជាធ្លាប់ផ្ដល់ទីតាំងឱ្យលោកស្រី យីងឡាក់ ធ្វើដំណើរឆ្លងកាត់ទៅកាន់ប្រទេសទី៣ ដើម្បីគេចខ្លួនពីការតាមចាប់របស់ក្រុមយោធា។

សូមបញ្ជាក់ថា លោកស្រី អ៊ុងអ៊ីង នាយករដ្ឋមន្រ្តីថៃ ធ្លាប់បានប្រមាថសម្ដេចតេជោ ហ៊ុន សែន, សម្ដេចធិបតី ហ៊ុន ម៉ាណែតថា ជាមេដឹកនាំអត់មានវិជ្ជាជីវៈ ដែលជាការប្រមាថមួយធ្ងន់ធ្ងរ ខណៈពាក្យសម្តីប្រមាថបែបនេះហើយ ប្រជាពលរដ្ឋខ្មែរ និងសម្ដេចតេជោ មិនអាចទទួលយកបាន ហើយមន្រ្ដីរាជរដ្ឋាភិបាលកម្ពុជាក៏បានទម្លាយសារសន្ទនារវាងសម្ដេច និងលោកស្រី ផែថងថាន នាយករដ្ឋមន្រ្តីថៃនាពេលកន្លងទៅ៕អត្ថបទ៖ វ៉ន ដារ៉ា