ទីភ្នាក់ងារមនុស្សធម៌របស់អង្គការសហប្រជាជាតិ (OCHA) បានព្រមានថា ជំងឺដែលអាចបង្ការបាននៅដែនដីហ្កាហ្សា កំពុងកើនឡើងយ៉ាងខ្លាំង និងបានសម្លាប់ជនស៊ីវិលអស់ជាច្រើន ដោយសារតែកង្វះឱសថ និងទឹកស្អាត ដែលត្រូវការជាចាំបាច់ ព្រោះតែការបិទខ្ទប់ផ្លូវរបស់អ៊ីស្រាអែល។

ការិយាល័យ OCHA នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ (២៦ មិថុនា) បាននិយាយថា ក្នុងរយៈពេលពីរសប្តាហ៍កន្លងទៅនោះ "ករណីជំងឺរាគរូសស្រួចស្រាវជាង ១៩.០០០ករណី ត្រូវបានកត់ត្រា រួមជាមួយនឹងជាង ២០០ករណីនៃជំងឺខាន់លឿងធ្ងន់ធ្ងរ និងជំងឺរាគរូសដល់ចេញឈាម"។

ទីភ្នាក់ងារនេះបន្ថែមថា "ការផ្ទុះឡើងនៃជំងឺទាំងនេះត្រូវផ្សារភ្ជាប់ដោយផ្ទាល់នឹងកង្វះទឹកស្អាត និងអនាម័យក្នុងតំបន់ហ្កាហ្សា ដោយបញ្ជាក់ពីតម្រូវការបន្ទាន់សម្រាប់ប្រេងឥន្ធនៈ ការផ្គត់ផ្គង់វេជ្ជសាស្រ្ត និងទឹក អនាម័យ និងសម្ភារៈអនាម័យ ដើម្បីការពារការដួលរលំបន្ថែមទៀតនៃប្រព័ន្ធសុខភាពសាធារណៈនៅដែនដីដ៏តូចចង្អៀតមួយនេះ"។

ការបិទផ្លូវរបស់អ៊ីស្រាអែល មិនឱ្យប្រេងឥន្ធនៈចូលទៅតំបន់ហ្កាហ្សា បានធ្វើឱ្យរោងចក្រចម្រោះទឹក និងប្រព័ន្ធទឹករបស់ដែនដីនេះត្រូវខូចខាត។ យោធាអ៊ីស្រាអែលបានបំផ្លាញផ្នែកជាច្រើននៃតំបន់ហ្កាហ្សា ដែលជម្លៀសប្រជាជនស្ទើរតែទាំងអស់ និងដាក់ការឡោមព័ទ្ធយ៉ាងថប់ដង្ហើមនៅលើតំបន់នោះ។ ក្រៅពីលក្ខខណ្ឌមនុស្សធម៌ដ៏ធ្ងន់ធ្ងរ យោធាអ៊ីស្រាអែលនៅតែបន្តសម្លាប់ប្រជាជនប៉ាឡេស្ទីនរាប់សិបនាក់នៅហ្កាហ្សាជារៀងរាល់ថ្ងៃ៕