ប្រធានផ្នែកមនុស្សធម៌របស់អង្គការសហប្រជាជាតិ (UN) កាលពីថ្ងៃព្រហស្បតិ៍ (ទី២៦ ខែមិថុនា) បានអំពាវនាវឲ្យមានការគាំទ្រជាអន្តរជាតិបន្ថែមទៀត សម្រាប់ជនភៀសខ្លួន នៅភាគខាងកើតដែលគ្រប់គ្រងដោយក្រុមឧទ្ទាមរបស់ប្រទេសកុងហ្គោ ដោយការលើកឡើងនេះកើតមាន នៅក្នុងដំណើរទស្សនកិច្ចលើកដំបូងរបស់លោកទៅកាន់ប្រទេសអាហ្វ្រិកកណ្តាលមួយនេះ។

បន្ទាប់ពីបានទៅមើលជំរុំជនភៀសខ្លួន នៅខេត្តភាគខាងកើត គឺ North Kivu និង South Kivu ប្រធានទីភ្នាក់ងារមនុស្សធម៌របស់ UN លោក Tom Fletcher បាននិយាយថា៖ «អ្វីដែលខ្ញុំបានឃើញនៅទីនេះ គឺថា តម្រូវការ គឺធំធេងណាស់។ ប្រជាជនត្រូវការថ្នាំ អាហារ និងការការពារ។ ពួកគេកំពុងប្រឈមជាមួយបញ្ហា និងការប្រឈមជាច្រើនយ៉ាងធ្ងន់ធ្ងរ ហើយពួកគេត្រូវការជំនួយគាំទ្រ»។

គួរបញ្ជាក់ថា ជម្លោះរយៈពេលជាច្រើនទស្សវត្សរ៍ នៅភាគខាងកើតកុងហ្គោ បានកើនឡើងយ៉ាងខ្លាំង ក្នុងខែមករា នៅពេលដែលក្រុមឧទ្ទាម M23 គាំទ្រដោយប្រទេសរ៉្វាន់ដា បានរុលទៅមុខ និងដណ្តើមកាន់កាប់ទីក្រុងយុទ្ធសាស្ត្រ Goma ក្នុងខេត្ត North Kivu ហើយបន្ទាប់មកទីក្រុង Bukavu ក្នុងខែកុម្ភៈ។

បើយោងតាម UN និងអ្នកស្រុក បានឲ្យដឹងថា នៅក្នុងខែកុម្ភៈ ក្រុមឧទ្ទាមបានបិទជំរុំតាំងទីលំនៅ ដែលនាំឲ្យមនុស្សជាង ១១០.០០០នាក់ បម្លាស់ទីលំនៅ ក្នុងរយៈពេលត្រឹមតែប៉ុន្មានថ្ងៃប៉ុណ្ណោះ។

ក្រុម M23 គឺជាក្រុមមួយ ក្នុងចំណោមក្រុមប្រដាប់អាវុធប្រហែល ១០០ក្រុម ដែលកំពុងប្រជែងដណ្តើមកាន់កាប់ទីតាំងមួយ នៅភាគខាងកើតកុងហ្គោដែលបម្បូរទៅដោយធនធានរ៉ែ នៅជិតព្រំដែនជាមួយរ៉្វាន់ដា ជាជម្លោះដែលបានបង្កឲ្យមានវិបត្តិមនុស្សធម៌ធ្ងន់ធ្ងរបំផុតមួយរបស់ពិភពលោក។ មនុស្សជាង ៤លាននាក់ ត្រូវបានផ្លាស់ទីលំនៅ ក្នុងនោះរួមទាំងរាប់សែននាក់ដែលបានភៀសខ្លួនចេញពីផ្ទះសម្បែង នៅឆ្នាំនេះផងដែរ៕