និយោជករបស់ខ្លួន បាននិយាយនៅថ្ងៃសុក្រនេះថា អ្នកសារព័ត៌មានទូរទស្សន៍ចិនម្នាក់ បានរងរបួសដោយសារការវាយប្រហារដោយយានដ្រូនរបស់អ៊ុយក្រែន នៅក្នុងតំបន់ឃើស ( Kursk) របស់ប្រទេសរុស្ស៊ី ខណៈដែលកំពុងរាយការណ៍ នៅជិតទីតាំងគោលដៅ។

និយោជករូបនេះ បានអះអាងថា លោក Lu Yuguang អ្នកយកព័ត៌មានរបស់ទូរទស្សន៍ Phoenix TV ដែលមានទំនាក់ទំនងនឹងរដ្ឋ «បានរងរបួសក្បាល» កាលពីរសៀលថ្ងៃព្រហស្បតិ៍ ហើយត្រូវបានបញ្ជូនទៅកាន់មន្ទីរពេទ្យ ដើម្បីព្យាបាល។

នៅក្នុងវីដេអូដែលផ្សព្វផ្សាយដោយទូរទស្សន៍រដ្ឋរុស្ស៊ីនៅថ្ងៃសុក្រនេះ លោក Lu ត្រូវបានគេមើលឃើញថាកំពុងនិយាយទៅកាន់អ្នកសារព័ត៌មាន ជាមួយនឹងបង់រុំពណ៌ស នៅលើក្បាលរបស់លោក ។

ក្រសួងការបរទេសរុស្ស៊ី បាននិយាយថា លោក Lu នៅជាមួយក្រុមអ្នកថតភាពយន្ត នៅភូមិ Korenevo នៅពេលមានការវាយប្រហារ។

ក្រសួងបានចោទប្រកាន់ទីក្រុងគៀវ ពីបទ «វាយប្រហារអ្នកកាសែតដោយចេតនា» និងបានអំពាវនាវឲ្យ «រដ្ឋាភិបាលដែលទទួលខុសត្រូវ ដើម្បីថ្កោលទោស»ចពោះការវាយប្រហារនេះ។

ក្រសួងការបរទេសរបស់ទីក្រុងប៉េកាំង ក៏បាននិយាយផងដែរថា ខ្លួនមាន «ការព្រួយបារម្ភយ៉ាងខ្លាំង» ដែលអ្នកកាសែតចិនម្នាក់ បានរងរបួស។

អ្នកនាំពាក្យលោក Guo Jiakun បាននិយាយថា៖«ភាគីចិនអំពាវនាវឲ្យភាគីទាំងអស់ ប្តេជ្ញាចិត្តចំពោះដំណោះស្រាយនយោបាយនៃវិបត្តិអ៊ុយក្រែន និងធ្វើការរួមគ្នាឆ្ពោះទៅរកការបន្ធូរបន្ថយភាពតានតឹង» ។

ប្រទេសចិនបានបង្ហាញពីខ្លួនឯងថា ជាភាគីអព្យាក្រឹតនៅក្នុងសង្គ្រាមជាងបីឆ្នាំរបស់រុស្ស៊ី ជាមួយអ៊ុយក្រែន។ ប៉ុន្តែរដ្ឋាភិបាលលោកខាងលិច និយាយថា ទំនាក់ទំនងជិតស្និទ្ធរបស់ទីក្រុងប៉េកាំង បានផ្តល់ការគាំទ្រផ្នែកសេដ្ឋកិច្ច និងការទូតយ៉ាងសំខាន់ ដល់ក្រុងទីក្រុងមូស្គូ។