នៅថ្ងៃសុក្រ (ទី២៧ ខែមិថុនា) នេះ ប្រទេសចិនបានបញ្ជាក់ពីសេចក្តីលម្អិត ស្តីពីក្របខណ្ឌនៃកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក ដោយប្រាប់ថា ទីក្រុងវ៉ាស៊ីនតោននឹងលុបចោលវិធានការរឹតត្បិតនានា ខណៈក្រុងប៉េកាំងនឹង «ពិនិត្យ ហើយអនុម័ត» អនុញ្ញាតដល់ទំនិញជាក់លាក់មួយចំនួន ក្រោមនីតិវិធីគ្រប់គ្រងការនាំចេញ។

គួរបញ្ជាក់ថា ភាគីទាំង២ បានព្រមព្រៀងគ្នា បន្ទាប់ពីមានកិច្ចពិភាក្សា នៅទីក្រុងហ្សឺណែវ ប្រទេសស្វីស ក្នុងខែឧសភា ដើម្បីកាត់បន្ថយអត្រាពន្ធគយជាបណ្តោះអាសន្នដែលដាក់សងសឹកគ្នាទៅវិញទៅមកក្នុងកម្រិតយ៉ាងធ្ងន់ធ្ងរ ចំពោះផលិតផលរបស់គ្នាទៅវិញទៅមក។

ប្រទេសចិន ក៏បានប្តេជ្ញាបន្ធូរបន្ថយវិធានការតបតមិនមែនពន្ធមួយចំនួនផងដែរ ប៉ុន្តែក្រោយមកមន្ត្រីអាមេរិក បានចោទប្រកាន់ទីក្រុងប៉េកាំងថា បានរំលោភលើកតិកាសញ្ញានេះ ហើយពន្យារការអនុម័តអាជ្ញាប័ណ្ណនាំចេញរ៉ែកម្រ។ តែនៅទីបំផុត ប្រទេសមានសេដ្ឋកិច្ចធំជាងគេបំផុតរបស់ពិភពលោកទាំង២ បានព្រមព្រៀងលើក្របខណ្ឌមួយ ដើម្បីបន្តឆ្ពោះទៅមុខជាមួយនឹងការស្រុះស្រួលគ្នា នៅទីក្រុងហ្សឺណែវ បន្ទាប់ពីមានកិច្ចពិភាក្សា នៅទីក្រុងឡុងដ្រ៍ ប្រទេសអង់គ្លេស ក្នុងខែនេះ។

មន្ត្រីសេតវិមានម្នាក់ក៏បានប្រាប់សារព័ត៌មាន AFP កាលពីថ្ងៃព្រហស្បតិ៍ផងដែរថា រដ្ឋបាលរបស់លោកប្រធានាធិបតី Donald Trump និងប្រទេសចិន បាន «យល់ព្រមលើការយោគយល់បន្ថែមទៀត សម្រាប់ក្របខ័ណ្ឌអនុវត្តកិច្ចព្រមព្រៀងទីក្រុងហ្សឺណែវ»។

ការបញ្ជាក់អះអាងនោះ បានកើតឡើងបន្ទាប់ពីលោក Trump បាននិយាយនៅឯព្រឹត្តិការណ៍មួយថា ទីក្រុងវ៉ាស៊ីនតោន «ទើបតែបានចុះហត្ថលេខា» លើកិច្ចព្រមព្រៀងមួយទាក់ទងនឹងពាណិជ្ជកម្មជាមួយប្រទេសចិន ដោយមិនផ្តល់ព័ត៌មានលម្អិតបន្ថែម។ ហើយទីក្រុងប៉េកាំងបានបញ្ជាក់នៅថ្ងៃសុក្រនេះថា កិច្ចព្រមព្រៀងមួយត្រូវបានសម្រេចឡើង៕