ឯកអគ្គរដ្ឋទូតសហរដ្ឋអាមេរិក ប្រចាំនៅប្រទេសរុស្ស៊ី គឺលោកស្រី Lynne Tracy កំពុងបញ្ចប់កាតព្វកិច្ចរបស់ខ្លួនហើយ។ នេះបើតាមការឲ្យដឹងពីស្ថានទូតរបស់លោកស្រី នៅថ្ងៃសុក្រ (ទី២៧ ខែមិថុនា) ដោយកត់សម្គាល់ថា លោកស្រីបានបំពេញតួនាទីឆ្លងកាត់រយៈពេលដ៏តានតឹងបំផុត ក្នុងទំនាក់ទំនង រវាងទីក្រុងមូស្គូ និងទីក្រុងវ៉ាស៊ីនតោន។

ការចាកចេញរបស់អ្នកការទូតអាជីពរូបនេះ ដែលត្រូវបានតែងតាំងក្រោមការគ្រប់គ្រងរបស់អតីតប្រធានាធិបតី លោក Joe Biden កើតឡើងនៅពេលដែលរុស្ស៊ី និងសហរដ្ឋអាមេរិក ពិភាក្សាអំពីលទ្ធភាពនៃការរៀបចំឡើងវិញនូវទំនាក់ទំនងរបស់ប្រទេសទាំង២ ដែលកាន់តែអាប់អួខ្លាំងឡើងៗ បន្ទាប់ពីទីក្រុងមូស្គូ បានចាប់ផ្តើមបង្កសង្រ្គាមទ្រង់ទ្រាយធំ នៅក្នុងប្រទេសអ៊ុយក្រែន កាលពីឆ្នាំ២០២២។

លោកប្រធានាធិបតី Donald Trump បាននិយាយថា មានកិច្ចព្រមព្រៀងវិនិយោគធំៗជាច្រើន ដែលអាចនឹងត្រូវបានឈានដល់ ប៉ុន្តែកំពុងមានការខកចិត្តកាន់តែខ្លាំងឡើងៗ ដែលកិច្ចប្រឹងប្រែងរបស់លោក ក្នុងការសម្របសម្រួលឲ្យមានកិច្ចព្រមព្រៀងសន្តិភាព ដើម្បីបញ្ចប់សង្គ្រាមនៅអ៊ុយក្រែន រហូតមកដល់ពេលនេះ មិនទាន់បង្កើតបាននូវបទឈប់បាញ់ដ៏មានអត្ថន័យនៅឡើយទេ។

ស្ថានទូតបានដកស្រង់សម្តីរបស់លោកស្រី Tracy ដែលបាននិយាយថា៖ «ខ្ញុំមានមោទនភាពដែលបានតំណាងប្រទេសរបស់ខ្ញុំ នៅទីក្រុងមូស្គូ ក្នុងអំឡុងពេលវេលាដ៏លំបាកនេះ។ នៅពេលខ្ញុំចាកចេញពីប្រទេសរុស្ស៊ី ខ្ញុំដឹងថា សហការីរបស់ខ្ញុំនៅស្ថានទូត នឹងបន្តធ្វើការ ដើម្បីកែលម្អទំនាក់ទំនង និងបន្តរក្សាចំណងទាក់ទងជាមួយប្រជាជនរុស្ស៊ី»។

គួរបញ្ជាក់ថា ស្ថានទូតបានឲ្យដឹងនៅដើមខែនេះថា លោកស្រី Tracy នឹងចាកចេញពីមុខតំណែងកឆាប់ៗនេះ។ លោកស្រីបានទៅទីក្រុងមូស្គូ ក្នុងខែមករា ឆ្នាំ២០២៣ ហើយត្រូវបានស្វាគមន៍ដោយក្រុមបាតុករដែលស្រែកពាក្យស្លោកប្រឆាំងសហរដ្ឋអាមេរិក នៅពេលលោកស្រីទៅកាន់ក្រសួងការបរទេស ដើម្បីបង្ហាញអត្តសញ្ញាណរបស់លោកស្រី។ អ្នកស្នងតំណែងបន្តពីលោកស្រី មិនទាន់ត្រូវបានបញ្ចេញឈ្មោះជាសាធារណៈនៅឡើយទេ៕