​បាល់ទាត់៖ ​ក្រុម​ជំរើសជាតិ​ថៃ​កាន់តែ​កៀក​ក្នុងការ​គ្រង​ជើងឯក​បាល់ទាត់​តំបន់​អាស៊ាន AFF Championship ជាលើក​ទី៦ ក្នុង​ប្រវត្តិសាស្ត្រ​បន្ទាប់ពី​យកឈ្នះ​ក្រុម​ឥណ្ឌូនេស៊ី​វគ្គ​ផ្តាច់ព្រ័ត្រ​ជើង​ទី១ ដល់​ទៅ ៤-០​។

​​ខ្សែបម្រើ​ក្លិប​ជប៉ុន Consadole Sapporo, Chanathip Songkrasin ដែល​រកបាន​ ២​គ្រាប់​ម្នាក់ឯង​ឱ្យ​ថៃ​យកឈ្នះវៀតណាម​នៅ​វគ្គ​ពាក់កណ្តាល​ផ្តាច់ព្រ័ត្រ​នោះ បន្ត​រកបាន​ ២​គ្រាប់​ម្នាក់ឯង​ទៀត​ក្នុងការ​ប្រកួត​ទល់នឹង​ឥណ្ឌូនេស៊ី​នេះ ដោយ​គ្រាប់​នាំមុខ​ដំបូង​តាំងពី​នាទី​ទី២ និង​គ្រាប់​ទី​២ ​នៅ​នាទី​ទី៥២​។ ​​ថៃ​ដែល​មិនដែល​ចាញ់​សោះ​ក្នុង​ព្រឹត្តិការណ៍ AFF Championship ឆ្នាំនេះ​មិន​បង្អង់​ការរក​គ្រាប់​បាល់​របស់ខ្លួន​ឡើយ ​ពោលគឺ​ពីរ​គ្រាប់​ទៀត​កើត​មាននៅ​នាទី​ទី៦៧ ដោយ Supachok Sarachart និង Bordin Phala នៅ​នាទី​ទី៨៣​។ ​​នេះ​ជា​ជ័យ​ជំនះ​ដ៏​ធំធេង​មួយ​សំរាប់​ក្រុម​របស់លោក Alexander Polking ដោយ​កាន់​គ្រាប់​ចំណេញ​ដល់​ទៅ ៤គ្រាប់​មុន​វគ្គ​ផ្តាច់ព្រ័ត្រ​ជើង​ទី២ នៅ​ថ្ងៃទី១ ខែមករា​ឆ្នាំ​ថ្មី​ខាងមុខ​។

​​ដោយឡែក​សំរាប់​ក្រុម​ឥណ្ឌូនេស៊ី​ហាក់​មានការ​លំបាក​ខ្លាំង និង​ចាញ់​ប្រៀប​ក្រុម​ថៃ​នៅ​វគ្គ​ផ្តាច់ព្រ័ត្រ​ជើង​ទី១ នេះដោយ​ឱកាស​ស៊ុត​ទៅ​លើ​ថៃ​មាន​តិចតួច​បំផុត​។ ​​រំលឹកថា ​ឥណ្ឌូនេស៊ី​បាន​ឡើង​មកដល់​វគ្គ​ផ្តាច់ព្រ័ត្រ AFF Championship ជា​លើក​ទី៦ ហើយ​តែ ៥លើក​មុន​មិនដែល​ឈ្នះ​ជើងឯក​ឡើយ ខណៈ​ថៃ​ឡើង​វគ្គ​ផ្តាច់ព្រ័ត្រ​នេះ​ជា​លើក​ទី៩ និង​ឈ្នះ​ជើងឯក​សរុប ៥លើក​មកហើយ​៕

​អត្ថបទ​៖​នាង សុភា​វុ​ធ