មនុស្សយ៉ាងហោច ៥នាក់ ត្រូវបានសម្លាប់ និងមនុស្សជាច្រើននាក់ផ្សេងទៀត កំពុងបាត់ខ្លួន ពេលដែលភ្លៀងធ្លាក់ខ្លាំងបង្កឲ្យមានទឹកជំនន់ដ៏គំហុកនៅរដ្ឋភាគខាងជើង Himachal Pradesh ប្រទេសឥណ្ឌាកាលពីថ្ងៃព្រហស្បតិ៍ម្សិលមិញ ។

អ្នកស្រុកម្នាក់និយាយថា ពួកយើងអាចសង្រ្គោះសាកសពមនុស្សបានតែម្នាក់ប៉ុណ្ណោះ ដោយសារចរន្តទឹកហូរខ្លាំងក្លាពេក ។

ផ្ទះសម្បែងនៅតាមដងទន្លេ ត្រូវបានបំផ្លិចបំផ្លាញ ហើយមនុស្សជាច្រើននាក់ទៀត កំពុងបាត់ខ្លួន ដោយសង្ស័យថាត្រូវបានចរន្តទឹកហូរនាំយកទៅ ។

លោក Sukhvinder Singh Sukhuគឺជាអភិបាលរដ្ឋ Himachal Pradesh និយាយថា មាននូវទឹកជំនន់ដ៏គំហុក ៩កន្លែង ។ មនុស្ស ២នាក់ដែលនៅជិតច្រាំងទន្លេ កំពុងបាត់ខ្លួន ។

លោកបន្តថា ពួកយើងបានរកឃើញសាកសពមនុស្ស ៣នាក់ ក្រោយផ្គររន្ទះត្រូវបានគេរាយការណ៍នៅតំបន់ភ្នំ Bada Pahad ។ មនុស្ស ៥នាក់ កំពុងបាត់ខ្លួន ហើយមានការខូចខាតច្រើនណាស់នៅតាមផ្លូវ ហើយផ្ទះ ១៥ខ្នងនៅតាមដងទន្លេ ត្រូវបានបំផ្លិចបំផ្លាញទាំងស្រុង ។

លោក Sukhvinder និយាយទៀតថា មនុស្សដែលបានស្លាប់មិនអាចរត់គេចចេញបានទេ ដោយសារចរន្តទឹកហូរខ្លាំងពេក ហើយពួកយើងឃើញក្រុមជួយសង្រ្គោះស្រង់បានសាកសពមនុស្សតែម្នាក់ប៉ុណ្ណោះ ៕