នៅថ្ងៃសុក្រ (ទី២៧ ខែមិថុនា) នេះ ទីក្រុងប៉េកាំងបានប្រាប់ឲ្យដឹងថា រដ្ឋមន្ត្រីការបរទេសចិន លោក Wang Yi នឹងធ្វើដំណើរទៅកាន់តំបន់អឺរ៉ុប នាសប្តាហ៍ក្រោយ ដើម្បីជួបពិភាក្សាជាមួយសមភាគីមកពីសហភាពអឺរ៉ុប (EU) អាល្លឺម៉ង់ និងបារាំង។

អ្នកនាំពាក្យក្រសួងការបរទេសចិន លោក Guo Jiakun បាននិយាយថា អ្នកការទូតជាន់ខ្ពស់របស់ចិន នឹងជួបសមភាគី EU គឺលោកស្រី Kaja Kallas នៅទីស្នាក់ការកណ្តាលរបស់ប្លុកនេះ នៅទីក្រុងប្រ៊ុចសែល ប្រទេសបែលហ្ស៊ិក សម្រាប់ «កិច្ចសន្ទនាយុទ្ធសាស្ត្រកម្រិតខ្ពស់ចិន-EU»។

នៅប្រទេសអាល្លឺម៉ង់ លោកនឹងជួបពិភាក្សាជាមួយរដ្ឋមន្ត្រីការបរទេស លោក Johann Wadephul ស្តីពីការទូត និងសន្តិសុខ ហើយនៅប្រទេសបារាំង លោកនឹងជួបជាមួយរដ្ឋមន្ត្រីទទួលបន្ទុកកិច្ចការអឺរ៉ុប និងបរទេស គឺលោក Jean-Noel Barrot។

ជាមួយគ្នានេះ ដោយប្រកាសអំពីដំណើរទស្សនកិច្ចនេះ លោក Guo បានប្រាប់សន្និសីទសារព័ត៌មានថា នៅទីក្រុងប្រ៊ុចសែល លោក Wang ក៏នឹងជួបពិភាក្សាផងដែរជាមួយនាយករដ្ឋមន្ត្រីបែលហ្ស៊ិក លោក Bart De Wever ព្រមទាំងឧបនាយករដ្ឋមន្ត្រី និងជារដ្ឋមន្ត្រីការបរទេស លោក Maxime Prevot៕