​បាល់ទាត់៖ លោក​ Alistair Heath ​គ្រូបង្វឹក​ក្រុម​អង្គ​រថា​យ​ហ្គឺ​រ​បាន​អះ​អាង​ថា កូន​ក្រុម​របស់​ខ្លួន​កំពុង​រីកចម្រើន​ខ្លាំង បន្ទាប់ពី​លោក​ដឹកនាំ និង​ប្រមូលផ្ដុំ​ហ្វឹកហាត់​មួយ​រយៈ​ពេល​ខ្លី​កន្លងមក ជាមួយ​ការ​ទាមទារ​លក្ខខណ្ឌ​ជាច្រើន​ក៏ដោយ។​ ​អតីត​គ្រូបង្វឹក​ក្រុមយុវជន​ក្លិប​ Leicester City ​បាន​បញ្ជាក់ថា លោក​បាន​លេង​ជាមួយនឹង​របៀបដែល​កីឡាករ​បាន​ព្យាយាម និង​សម្រប​តាមរបៀប​លេង ក៏ដូចជា​វិធី​ហ្វឹកហាត់​របស់ខ្លួន។ ក្នុងនោះ​លោក​បានទាមទារ​ច្រើន​ពី​កីឡាករ ហើយ​ពួកគេ​ក៏បាន​ធ្វើតាម​អ្វីដែល​គ្រូបង្វឹក​ថ្មី​រូបនេះ​ចង់បាន​ដែរ។​

​គ្រូបង្វឹក​សញ្ជាតិ​អង់គ្លេស​ដដែល​បន្ថែមថា លោក​នឹង​បន្ដ​ទាមទារ​បន្ថែមទៀត​ពី​កីឡាករ​ទាំងអស់ ដែល​ពួកគេ​ក៏​បានដឹង​ដូចគ្នា។ តែ​យ៉ាង​ណា​លោក​បាន​សង្កត់ធ្ងន់ថា ពួកគេ​កំពុង​រីកចម្រើន​យ៉ាងខ្លាំង​ក្នុង​រយៈពេល​ដ៏​ខ្លី​នេះ បន្ទាប់ពី​ពួកគេ​បានធ្វើការ​ប្រមូលផ្ដុំ​ហ្វឹកហាត់​ជាមួយគ្នា។​ ​គួរ​ដឹងថា មកទល់ពេលនេះលោក​ Alistair Heath ​ទើប​ដឹកនាំ​ក្រុម​អង្គ​រថា​យ​ហ្គឺ​របា​ន ១១​ថ្ងៃ​ប៉ុណ្ណោះ ហើយ​លោក​ក៏​កំពុងតែ​ធ្វើតេស្ដកីឡាករ​មួយចំនួនក៏ដូចជា​សម្លឹង​រក​កីឡាករ​បរទេស សម្រាប់​ត្រៀម​រដូវ​កាល​ថ្មី​ខាងមុខ​ផងដែរ ជាក់ស្ដែង​ពេលនេះអង្គ​រថា​យ​ហ្គឺ​រទើប​នាំចូល​កីឡាករ​ថ្មី​ម្នាក់​ប៉ុណ្ណោះ គឺ​ខ្សែការពារ​កណ្ដាល​ជនជាតិ​ជប៉ុន​ Soh Narita ​ដែល​ផ្ទេរ​មកពី​ក្លិប​ Samut Prakan ​នៃ​លី​គ​ទី​៣ ថៃ៕

​អត្ថបទ៖ លី ឈុន​ឡា