នៅថ្ងៃសុក្រនេះ ប្រធានាធិបតីរុស្ស៊ីលោក Vladimir Putin និងរជ្ជទាយាទក្រុង Abu Dhabi ព្រះអង្គម្ចាស់ Khaled bin Mohamed Al Nahyan មាននូវជំនួបទ្វេភាគីនៅទីក្រុង Minsk ជាទីកន្លែងរៀបចំកិច្ចប្រជុំកំពូលសេដ្ឋកិច្ចអឺរ៉ាស៊ី(អឺរ៉ុប និងអាស៊ី) ។ 

ទីភ្នាក់ងារព័ត៌មានរដ្ឋរុស្ស៊ី TASS រាយការណ៍ដោយស្រង់សម្តីអ្នកនាំពាក្យវិមានក្រឹមឡាំងលោក Dmitry Peskov ថា នៅមុននេះ រជ្ជទាយាទ Al Nahyan បានចុះហត្ថលេខាលើកិច្ចព្រមព្រៀងពាណិជ្ជកម្មសេរីជាច្រើន រវាងអារ៉ាប់រួម និងសហភាពសេដ្ឋកិច្ចអឺរ៉ាស៊ី ។

លោក Putin បានស្នើសុំព្រះអង្គម្ចាស់ Al Nahyan ពាំពាក្យជូនពររបស់លោកដល់ប្រធានាធិបតីអារ៉ាប់រួម ហើយលោកនិយាយថា លោកសង្ឃឹមថានឹងស្វាគមន៍ទ្រង់នៅរុស្ស៊ីនាខែសីហា ឬខែតុលា អំឡុងកិច្ចប្រជុំកំពូលរុស្ស៊ី-អារ៉ាប់លើកដំបូង ។

អ្នកនាំពាក្យវិមានក្រឹមឡាំង និយាយថា លោក Putin មានគម្រោងជួបសន្ទនាទ្វេភាគីជាច្រើននៅក្រៅកិច្ចប្រជុំកំពូលអឺរ៉ាស៊ី ៕