ទីប្រជុំជន La Piojera ស្ថិតក្នុងទីក្រុង Santiago បានក្លាយជាមជ្ឈមណ្ឌលភ្លើងពណ៌រាត្រីអស់រយៈពេលជាង ១សវត្សរ៍មកហើយ ធ្វើឲ្យទាក់ទាញភ្ញៀវ និងអ្នកស្រុកមកទទួលទានអាហារបែបប្រពៃណី ទទួលទានភេសជ្ជៈ និងស្តាប់តន្រ្តី ប៉ុន្តែឥឡូវ ទ្វាររង្គសាលឆាប់បិទ ហើយការលក់កំពុងដាំក្បាលចុះខ្លាំង ស្របពេលដែលឧក្រិដ្ឋកម្មកើនឡើង ធ្វើឲ្យប៉ះពាល់យ៉ាងខ្លាំងដល់ប្រទេសមួយនេះ និងសេដ្ឋកិច្ចរបស់ពួកគេ ។

យោងតាមការសិក្សាចេញដោយមជ្ឈមណ្ឌលស្រាវជ្រាវ CLAPES UC នៅសាកលវិទ្យាល័យ Universidad Catolica របស់ឈីលី បានឲ្យដឹងថា ឈីលីនឹងបាត់បង់ជាមធ្យម ២,៦ភាគរយនៃផលិតផលក្នុងស្រុកសរុប(GDP)របស់ពួកគេ ដែលស្មើនឹងប្រហែល ៨,២ពាន់លានដុល្លារ ក្នុង ១ឆ្នាំ ដោយសារឧក្រិដ្ឋកម្មកើនឡើង ។ របាយការណ៍នេះ រួមចំណែកផលប៉ះពាល់សេដ្ឋកិច្ច និងធុរកិច្ច ដូចជារង្គសាល La Piojera ពេលដែលហាងរបស់ពួកគេ ឆាប់បិទទ្វារ ឬបិទទ្វារតែម្តងនៅតំបន់ដែលមានករណីឧកិ្រដ្ឋកម្មខ្ពស់ ធ្វើឲ្យខាតបង់ការវិនិយោគ និងការចំណាយកើនឡើងលើសន្តិសុខ ។

លោក Mauricio Gajardo គឺជាអ្នកគ្រប់គ្រងរង្គសាល La Piojera និយាយប្រាប់ទីភ្នាក់ងារព័ត៌មានរ៉យទ័រពេលដែលមានភ្ញៀវប៉ុន្មានប៉ុណ្ណោះនៅក្នុងហាងថា ការលក់របស់ពួកយើងបានធ្លាក់ចុះ ៦០ភាគរយ ។ លោកថា រង្គសាល La Piojera ធ្លាប់មានភ្ញៀវពេញនៅវេលាម៉ោង ៨យប់ ថ្ងៃសៅរ៍ និងបិទទ្វារនៅពាក់កណ្តាលយប់ ។ ឥឡូវជាមធ្យម លោកបិទហាងនៅវេលាម៉ោង ៨ និង ៣០នាទីយប់ ។

លោក Gajardo និយាយទៀតថា ទីក្រុងជួយលោកតែឆ្មាំក្រុងប៉ុន្មានប៉ុណ្ណោះប៉ុណ្ណោះ ប៉ុន្តែភ្ញៀវនៅតែនិយាយថា តំបន់នេះគ្រោះថ្នាក់ណាស់ ។

ធុរកិច្ចផ្សេងទៀត ព្យាយាមវិធីសាស្រ្តផ្សេង ដោយផ្តល់ការបញ្ចុះតម្លៃដល់អតិថិជន ដើម្បីឲ្យពួកគេនៅពេញមួយយប់ ។ លោក Cristian Gonzalez គឺជាអ្នកគ្រប់គ្រងរង្គសាល Bar & Vuelvo និយាយថា ក្រោយម៉ោង ១០យប់ ពួកយើងកត់សំគាល់ឃើញថា ធុរកិច្ចរបស់ពួកគេធ្លាក់ចុះខ្លាំងណាស់ ។ ដូច្នេះហើយ ពួកយើងត្រៀមខ្លួនប្រឈមនឹងបញ្ហានេះ ជាមួយនឹងការបញ្ចុះតម្លៃ ឬផ្តល់ជូនការបញ្ចុះតម្លៃ នៅក្រោយម៉ោង ១១ ឬម៉ោង ១២យប់ ។

 សូមបញ្ជាក់ថា ប្រទេសឈីលី មើលឃើញការហក់ឡើងខ្ពស់ករណីឃាតកម្ម ចាប់តាំងពីឆ្នាំ ២០១៦រហូតមក ៕

SaratBTV, [6/27/2025 9:04 PM]