លោកប្រធានាធិបតី Donald Trump បានរិះគន់យ៉ាងខ្លាំងទៅលើមេដឹកនាំកំពូលរបស់ប្រទេសអ៊ីរ៉ង់ លោក Ali Khamanei កាលពីថ្ងៃសុក្រ ដោយបានលុបចោលផែនការដកទណ្ឌកម្មលើប្រទេសអ៊ីរ៉ង់ និងបាននិយាយថា លោកនឹងពិចារណាទម្លាក់គ្រាប់បែកលើអ៊ីរ៉ង់ម្តងទៀត ប្រសិនបើទីក្រុងតេអេរ៉ង់នឹងចម្រាញ់សារធាតុអ៊ុយរ៉ានីញ៉ូមដល់កម្រិតគួរឱ្យព្រួយបារម្ភ។

លោក Trump បានប្រតិកម្មយ៉ាងខ្លាំងចំពោះការនិយាយលើកឡើងដំបូងរបស់លោក Khamanei បន្ទាប់ពីជម្លោះរយៈពេល១២ថ្ងៃជាមួយអ៊ីស្រាអែល ដែលបានបញ្ចប់នៅពេលដែលសហរដ្ឋអាមេរិកបានបើកការវាយឆ្មក់ទម្លាក់គ្រាប់បែកកាលពីចុងសប្តាហ៍មុនទៅលើទីតាំងរោងចក្រនុយក្លេអ៊ែរអ៊ីរ៉ង់។

អ៊ីរ៉ង់បាន «ទះកំផ្លៀងអាមេរិក» ដោយបានបើកការវាយប្រហារទៅលើមូលដ្ឋានកងទ័ពអាមេរិកដ៏សំខាន់ក្នុងប្រទេសកាតា បន្ទាប់ពីការវាយឆ្មក់ទម្លាក់គ្រាប់បែករបស់អាមេរិក។ លោក Khamanei បាននិយាយថា អ៊ីរ៉ង់នឹងមិនចុះចាញ់ឡើយ។ 

លោក Trump បាននិយាយថា លោកបានទុកជីវិតឲ្យលោក Khamanei ខណៈដែលមន្ត្រីអាមេរិកបានប្រាប់សារព័ត៌មានប្រាប់រ៉យទ័រកាលពីថ្ងៃទី ១៥ ខែមិថុនាថា លោក Trump បានវេតូផែនការរបស់អ៊ីស្រាអែលក្នុងការសម្លាប់មេដឹកនាំកំពូលរូបនេះ។ លោក Trump បាននិយាយនៅក្នុងការបង្ហោះលើបណ្តាញផ្សព្វផ្សាយសង្គមថា «ប្រទេសរបស់លោក Khamanei ត្រូវបានបំផ្លាញ រោងចក្រនុយក្លេអ៊ែរចំនួនបីក៏ត្រូវបានបំផ្លាញ ហើយខ្ញុំដឹងច្បាស់ថាលោក Khamanei បានជ្រកកោននៅកន្លែងណា ហើយនឹងមិនអនុញ្ញាតឱ្យអ៊ីស្រាអែលឬកងកម្លាំងប្រដាប់អាវុធរបស់សហរដ្ឋអាមេរិក និងប្រទេសមានឥទ្ធិពលបំផុតក្នុងពិភពលោក បញ្ចប់ជីវិតរបស់លោកឡើយ ។