ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា បានថ្លែងថា គណបក្សប្រជាជនកម្ពុជា បានរួមសុខរួមទុក្ខ ជាមួយបងប្អូនប្រជាពលរដ្ឋ គ្រប់ដំណាក់​កាលទាំងអស់ ហើយមួយវិញទៀត គឺជាគណបក្សដែលមានសមត្ថភាព​គ្រប់គ្រាន់​ក្នុងការការពារជាតិ ការកសាង និង ថែរក្សានូវសុខសន្តិភាព​ និងការអភិវឌ្ឍសេដ្ឋកិច្ចសង្គមជាដើម។

ក្នុងឱកាសអបអរសាទរ ខួបអនុស្សាវរីយ៍លើកទី៧៤ឆ្នាំ នៃការបង្កើតគណបក្សប្រជាជនិកម្ពុជា (២៨មិថុនា ឆ្នាំ១៩៥១-២៨មិថុនាឆ្នាំ២០២៥) ដែលបានធ្វើឡើងនៅវិមាន៧មករា នាព្រឹកថ្ងៃទី២៨ ខែមិថុនា ឆ្នាំ២០២៥នេះ​ សម្តេចតេជោ ហ៊ុន សែន បានបញ្ជាក់ថា ​គណបក្សប្រជាជនកម្ពុជា នឹងមិនរត់​ ចោលបងប្អូន​ប្រជាពលរដ្ឋខ្មែរនោះឡើយ ផ្ទុយទៅវិញមានតែបន្តដឹកនាំ​បងប្អូន​ប្រជាពលរដ្ឋ​ឆ្ពោះទៅកាន់ភាពរុងរឿង​ និងរីកចម្រើនជាបន្តបន្ទាប់បន្ថែមទៀត។

សម្តេចតេជោ ហ៊ុន សែន បានបញ្ជាក់ទៀតថា ការសម្រេចបានជោគជ័យរបស់​គណបក្សប្រជាជន​កម្ពុជា​ក្នុងការ​ដឹកនាំ​ប្រទេសអស់រយៈពេលជាង៤៦ឆ្នាំមកនេះ ​គឺ​ដោយសារតែគណបក្សមាន​ភាព​ត្រឹមត្រូវខាង​នយោបាយគ្រប់កាលៈទេសៈ ​និង​គ្រប់ស្ថានភាព​ ហើយបានផ្សារភ្ជាប់​ជានិច្ច​ជាមួយ​ប្រជាជនកម្ពុជា ពោលគឺហ៊ានគិត​ ហ៊ានថា ហ៊ានធ្វើ និងហ៊ានទទួលខុសត្រូវ ដែលបានធ្វើ​ឲ្យប្រជាជន​ស្រលាញ់ និងជឿជាក់មកលើគណបក្សរហូតដល់សព្វថ្ងៃនេះ។

ជាមួយគ្នានោះដែរ​ សម្តេចតេជោ ហ៊ុន សែន មានប្រសាសន៍ទៀតថា គណបក្សប្រជាជនកម្ពុជា គឺជា​គណបក្សដែលមានរចនាសម្ព័ន្ធ​ចាត់តាំងរឹងមាំ ​ពីលើរហូតដល់ក្រោម​ មាន​សមាជិកច្រើនកុះករ និង​មានរបៀបរបបធ្វើការច្បាស់លាស់ ​និងម៉ត់ចត់ ​ហើយមួយវិញទៀត​មានជួរមន្រ្តីដែលស្មោះត្រង់ មាន​សម្ថភាព គុណធម៌ និងសីលធម៌។

មួយវិញទៀតគណបក្សប្រជាជនកម្ពុជា​មានការគិតគូរយ៉ាង​ម៉ត់ចត់​ល្អិនល្អន់​ ក្នុងការកសាងជំនាន់ ដែល​ត្រូវបន្តវេន​ប្រកប​ដោយ​សាមគ្គីភាព​ ឯកភាពផ្ទៃ​ក្នុងរឹងមាំ ​គ្មាន​ការរង្គោះ រង្គើនោះឡើយ៕

អត្ថបទ៖ បាន ចក់