ភ្នំពេញ៖ សម្តេចតេជោ ហ៊ុន សែន ប្រធានគណបក្ស ប្រជាជនកម្ពុជា និងជាប្រធានព្រឹទ្ធសភា បានប្រកាសអំពាវនាវ ប្រជាពលរដ្ឋទាំងអស់ ត្រូវរួមគ្នា ថែរក្សាការពារសន្តិភាពឱ្យបានគង់វង្ស និងរួមគ្នាកម្ចាត់ចលនាជ្រុលនិយម ឱ្យអស់ពីសង្គមកម្ពុជា មិនទុកឱ្យវាមកបំផ្លាញ សុខសន្តិភាពដែលកំពុងកើតមាននាពេលសព្វថ្ងៃនេះបាននោះឡើយ ។

ក្នុងឱកាប្រារព្ធពិធីអបអរសាទរ ខួបអនុស្សាវរីយ៍លើកទី៧៤ (២៨ មិថុនា ១៩៥១-២៨ មិថុនា ២០២៥) ថ្ងៃបង្កើតគណបក្ស ប្រជាជនកម្ពុជា នៅព្រឹកថ្ងៃទី២៨ ខែមិថុនា ឆ្នាំ២០២៥នេះ សម្តេចតេជោ ហ៊ុន សែន បានបញ្ជាក់ថា សន្តិភាពពេញលេញ និងការឯកភាពជាតិ ឯកភាព​ទឹកដី​ទាំងស្រុង ជាសមិទ្ធផលដ៏វិសេសវិសាលដែលយើងសម្រេចបានមកយ៉ាងលំបាក តាមរយៈ​នយោបាយ​ឈ្នះ ឈ្នះ ដោយឆ្លងកាត់ការតស៊ូ ​ការអត់ធ្មត់ និងការទប់ទល់នឹងកត្តា​អវិជ្ជមាន​ច្រើន​ណាស់។ ប៉ុន្តែសន្តិភាពនៅមានការគំរាមកំហែងនៅ ឡើយពីសំណាក់ក្រុមជ្រុលនិយម​មួយ​ក្តាប់តូច ដែលព្យាយាម​ធ្វើឱ្យ​សង្គម ​មានការ​បែកបាក់​ពោរពេញដោយ​កំហឹង​ ការភាន់ច្រឡំ ​និងភាព​សម្អប់ សំដៅ​ឈានទៅផ្ដួល​ រំលំរាជរដ្ឋាភិបាលតាមមធ្យោបាយ ​ហិង្សា​ ដែលផ្ទុយពីរដ្ឋធម្មនុញ្ញ និងគោលការណ៍​នៃលទ្ធិប្រជាធិបតេយ្យជាដើម។

សម្តេចតេជោ ហ៊ុន សែន ​បានបញ្ជាក់ថា« ដូច្នេះ យើងត្រូវអរគុណសន្តិភាព ត្រូវរួមគ្នា​ថែរក្សា​ការពារ​សន្តិភាពឱ្យបានគង់វង្ស ​និងរួមគ្នាកម្ចាត់ចលនាជ្រុលនិយម​ឱ្យអស់ពីសង្គមកម្ពុជា មិនទុក​ឱ្យវាមកបំផ្លាញសន្តិភាពបានឡើយ»។

ជាមួយគ្នានោះដែរ​សម្តេចតេជោ ហ៊ុន សែន ប្រមុខដឹកនាំគណបក្សកាន់អំណាចក៏បានអំពាវនាវ ដល់បងប្អូនជនរួមជាតិទាំងអស់គប្បីត្រូវបញ្ឈប់​សកម្មភាពទាំងឡាយណា ដែលមាន​លក្ខណៈជ្រុលនិយម ផ្ទុយនឹងច្បាប់រដ្ឋធម្មនុញ្ញ។ ដោយសម្តេច​បានសង្កត់ធ្ងន់ថា« ខ្ញុំក៏សូមយកឱកាសនេះ បញ្ជាក់ថែមទៀតថា ចំពោះជនទាំងឡាយ ដែលនៅតែបន្តសកម្មភាព ជ្រុលនិយម បំពានរដ្ឋធម្មនុញ្ញ និងច្បាប់ជាធរមាន ត្រូវ បញ្ឈប់សកម្មភាពរបស់ខ្លួន បើពុំដូច្នោះទេ អ្នកនឹងពុំអាចគេចផុតពីសំណាញ់ច្បាប់បានឡើយ»។

ជាមួយគ្នានោះដែរសម្តេចតេជោ ហ៊ុន សែន ក៏បានរំលឹកផងដែរថា សាមគ្គីភាពជាតិជាអាយុជីវិត របស់ជាតិ មានសាមគ្គីភាពទើបជាតិរស់ បើបែកបាក់សាមគ្គីភាព ជាតិនឹងត្រូវស្លាប់ ដោយប្រវត្តិ​សាស្រ្តបាន បង្ហាញច្បាស់ និងគ្រប់គ្រាន់ហើយនូវហេតុផលនេះ។

សម្តេចតេជោ ហ៊ុន សែន បានបញ្ជាក់បន្ថែមទៀតថា គណបក្សប្រជាជនកម្ពុជា ដែលបាន​ជ្រោង​ទង់មហាសាមគ្គីជាតិនៅគ្រប់ដំណាក់កាល ​និងបន្តអនុវត្ត កតព្វកិច្ចនេះប្រកបដោយ​ជំហរ​ទទួល​ខុស​ត្រូវខ្ពស់បំផុតចំពោះវាសនាជាតិ​ ក្រោមដំបូលរដ្ឋធម្មនុញ្ញនៃព្រះរាជាណាចក្រកម្ពុជា និង​បាវចនា ជាតិ សាសនា ព្រះមហាក្សត្រ៕ អត្ថបទ បាន ចក់