បាល់ទាត់៖ លោក ទេព ឡុងរចនា បានត្រឡប់ទៅកាន់ក្លិបកងយោធពលខេមរភូមិន្ទវិញហើយ ដោយទទួលបានតំណែងចាស់ជាអ្នកចាត់ការក្រុមជំនួសលោក Lee Tae Hoon ដែលទើបចាកចេញទៅក្លិបវិសាខាកាលពីថ្មីៗ។ គួរដឹងថា លោក ទេព ឡុងរចនា បានបាត់មុខពីក្រុមកងយោធពលខេមរភូមិន្ទនេះតាំងពីឆ្នាំ២០២០ ហើយត្រូវបានគេសង្ស័យលោកបានចាកចេញទៅដឹកនាំខេត្តព្រៃវែង បន្ទាប់ពីលេចវត្តមានអតីតគ្រូបង្វឹកក្រុមគិរីវង់រូបនេះដឹកនាំខេត្តព្រៃវែង តែមួយរយៈពេលខ្លីក្រោយមកក៏បាត់វត្តមានលោកពីសមរភូមិវាលស្មៅទៀត។
ទើបតែថ្មីៗនេះក្លិបមានមូលដ្ឋាននៅកីឡដ្ឋានស្ដាតចាស់នេះ បានប្រកាសពីការវិលត្រឡប់ជាថ្មីរបស់គ្រូបង្វឹក ដ៏មានបទពិសោធន៍រូបនេះ ជាមួយតួនាទីចាស់គឺជាអ្នកចាត់ការក្រុម សម្រាប់ត្រៀមរដូវកាលថ្មីឆ្នាំ២០២២ ខាងមុខ ជំនួសតំណែងលោក Lee Tae Hoon ដែលក្លិបបានប្រកាសចែកផ្លូវមុនបញ្ចប់កិច្ចសន្យាកាលពីថ្មីៗ។ គួរដឹងថា កាលពីរដូវកាលឆ្នាំ២០២១ កន្លងទៅ ក្រុមកងយោធពលខេមរភូមិន្ទពុំបានសម្រេចលទ្ធផលគាប់ប្រសើរនោះទេ ក្រោមការដឹកនាំរបស់លោក Lee Tae Hoon ដោយបញ្ចប់ត្រឹមចំណាត់ថ្នាក់លេខ៧ នៃលីគកំពូលកម្ពុជា និងធ្លាក់ត្រឹមវគ្គ ១៦ក្រុមចុងក្រោយនៃពានរង្វាន់សម្ដេចតេជោ ហ៊ុន សែន-ថ្នាក់ជាតិ ក្រោយចាញ់ក្រុមអគ្គិសនីកម្ពុជា ៤-០។ ការណ៍នេះអាចជាកត្ដាដ៏សំខាន់នាំឲ្យក្លិបសម្រេចផ្លាស់ប្ដូរក្បាលម៉ាស៊ីន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
