ប៉ៃលិន៖ បន្ទាប់ពីទទួលបានព័ត៌មានថា មានពលករខ្មែរម្នាក់ បានជួបគ្រោះថ្នាក់ចរាចរណ៍នៅប្រទេសថៃ ត្រូវបានគេទុកចោលមិនព្យាបាល ព្រមទាំងទារថ្លៃសេវាខូចខាតសម្ភារទៀតនោះ ប្រមាណបីម៉ឺនបាត (លុយថៃ) លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានចាត់មន្ត្រីជំនាញច្រកទ្វារព្រំដែន និង ក្រុមគ្រូពេទ្យ ចុះសម្របសម្រួល ដើម្បីយកពលករខ្មែរនោះមកធ្វើការព្យាបាលភ្លាមៗ នាថ្ងៃទី២៧ ខែមិថុនា នេះ ដោយមិនទុកចោលឡើយ ។

ពលករខ្មែរ ដែលជួបគ្រោះថ្នាក់ចរាចរណ៍ មានឈ្មោះ ង៉ែត សុភ័ស្ស ភេទប្រុស អាយុ៣៨ឆ្នាំ ជា កម្មករធ្វើការនៅប្រទេសថៃ មានអាការៈធ្ងន់ធ្ងរមួយចំហៀងខ្លួន មានទីលំនៅ ភូមិគោកឃ្មុំ ឃុំគោកឃ្មុំ ស្រុក ថ្មគោល ខេត្តបាត់ដំបង និងមានប្រពន្ធឈ្មោះ រឿន មករា រស់នៅជាមួយគ្នា។

លោក សែត វិចិត្រ នាយករដ្ឋបាលសាលាខេត្តប៉ៃលិន បានមានប្រសាសន៍ឲ្យដឹងថា ក្រោយពី ទទួលដំណឹងថា មានពលករខ្មែរម្នាក់ជួបគ្រោះថ្នាក់ចរាចរណ៍នៅប្រទេសថៃ ដោយមិនមានការ​ព្យាបាល ព្រមទាំងទុកចោលនោះ លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានធ្វើការ​ទំនាក់ទំនង ភ្លាមៗទៅភាគីប្រទេសថៃ ដើម្បីឲ្យបញ្ជូនពលករយកមកព្យាបាលទាន់ពេលវេលា ដែលថ្លៃព្យាបាល និងការ ធ្វើដំណើរ ព្រមទាំងអាហារសម្រាប់ពលកររងគ្រោះ គឺមានការ​ឧបត្ថម្ភទាំងស្រុងពីលោកជំទាវបណ្ឌិត។ នេះសបញ្ជាក់ថា លោកជំទាវបណ្ឌិតអភិបាលខេត្ត តែងតែបង្ហាញការយកចិត្តទុកដាក់ខ្ពស់ ចំពោះសុខទុក្ខ របស់ពលករចំណាកស្រុក ដែលវិលត្រឡប់​មកពីប្រទេសថៃ។ ការយកចិត្តទុកដាក់នេះ មិនត្រឹមតែ ជាការ លើកទឹកចិត្ត​ប៉ុណ្ណោះទេ ប៉ុន្តែថែមទាំង ជាសកម្មភាពជាក់ស្តែង ក្នុងការជួយដោះស្រាយបញ្ហាប្រឈម នានាដែលពលករ​ជួបប្រទះ។ អ្វីដែលកាន់តែពិសេសនោះ គឺលោកជំទាវអភិបាលខេត្ត បានផ្តល់សេវារថ យន្តជូនទៅដល់ស្រុកកំណើតដោយឥតគិតថ្លៃ សម្រាប់ពលករដែលវិលត្រឡប់មកពីប្រទេសថៃ ដែលនេះ ជាការជួយសម្រួលដល់ការធ្វើដំណើររបស់ពួកគេបានយ៉ាងច្រើន និងកាត់បន្ថយការ​ចំណាយ ហើយសកម្ម ភាពទាំងនេះ បានបង្ហាញពីការទទួលខុសត្រូវខ្ពស់ និងភាពជាអ្នកដឹកនាំ​ដ៏ល្អរបស់លោកជំទាវក្នុងការ បម្រើប្រជាជន ។

ស្ត្រីឈ្មោះ រឿន មករា ដែលជាប្រពន្ធរបស់ពលកររងគ្រោះ បានឲ្យដឹងថា ប្តីរបស់គាត់ជួបគ្រោះ ថ្នាក់ចរាចរណ៍នៅថ្ងៃទី២៥ ខែមិថុនា នេះ វេលាម៉ោង៩យប់ ខណៈដើរទៅទិញម្ហូបយកមកហូបជុំគ្រួសារ ក៏ត្រូវបានរថយន្តថៃមួយគ្រឿងបើកមកបុកពីក្រោយក្នុងទិសដៅស្របគ្នា បណ្តាលឱ្យប្តីរបស់គាត់ខ្ទាតទៅប៉ះបង្គោលក្បែរផ្លូវ ត្រូវបានម្ចាស់បង្គោលទារឱ្យសងថ្លៃខូចខាតចំនួន៣ម៉ឺន បាត (ប្រាក់ថៃ) ស្មើលុយខ្មែរជាង៣លានរៀល។ ប្រពន្ធជនរងគ្រោះ បានបញ្ជាក់ថា៖ ប្តីរបស់គាត់គ្រោះ ថ្នាក់រហូតសន្លប់នៅហ្នឹងកន្លែង យកទៅព្យាបាលក៏គេមិនមើលដែរ ទុកប្តីរបស់គាត់ចោល ព្រោះតែគាត់មិន មានលុយព្យាបាល ទើបតែថ្ងៃទី២៧ ខែមិថុនា នេះ ភាគីថៃ បានបញ្ជូនប្តីមកប្រទេសខ្មែរវិញ ទាំងឈឺមិន ដឹងខ្លួន ត្រូវបានក្រុមគ្រូពេទ្យ និងមន្ត្រីច្រកទាំងអស់ជួយសង្គ្រោះ ។ ជាមួយនេះ រូបគាត់ និងក្រុមគ្រួសារ សូមថ្លែងអំណរគុណដល់លោកជំទាវបណ្ឌិត បាន ស្រីមុំ អភិបាលខេត្តប៉ៃលិន ដែលបានចាត់ក្រុមគ្រូពេទ្យ ជំនាញ ជួយព្យាបាលជំងឺ និងឧបត្ថម្ភថវិកា ថ្លៃព្យាបាល និងថ្លៃធ្វើដំណើរ ព្រមទាំងអាហារ ដល់គ្រួសារ របស់គាត់ ៕