ភ្នំពេញ ÷ រាជរដ្ឋាភិបាលលើកទឹកចិត្តបំពាក់គ្រឿងឥស្សរិយយសជូនដល់ម្ចាស់សហគ្រាស និងអ្នកមានស្នាដៃដែលបានចូលរួមក្នុងការ អភិវឌ្ឍន៍សង្គម និងសេដ្ឋកិច្ច ខណៈដែលរាជរដ្ឋាភិបាលនៅក្នុងអាណត្តិទី៧ បានកំពុងយកចិត្តទុកដាក់ និងការបន្តធានាសេដ្ឋកិច្ច និង ជំរុញកំណើនសេដ្ឋកិច្ចខ្ពស់។

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុងពិធីសំណេះសំណាល និងពិសាអាហារ សាមគ្គីមហាគ្រួសារសហគ្រាសធុនតូច និង មធ្យម និងសិប្បកម្មកម្ពុជា នៅថ្ងៃទី២៧ មិថុនា ឆ្នាំ២០២៥ ម្សិលមិញនេះ, សម្តេចធិបតី បានចាត់ទុកសហគ្រាសធុនតូច និងមធ្យម និងសិប្បកម្ម បានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច-សង្គមកម្ពុជា ដែលមាន ចំណែករហូតជាង ៩០ ភាគរយ នៃអាជីវកម្មទាំងអស់ ការបង្កើតការងារ ផ្តល់ប្រាក់ចំណូលផ្ទាល់និងប្រយ៉ោល និងបង្កើនជីវភាពរបស់ ប្រជាពលរដ្ឋមានការរីកចម្រើនជាបន្ដបន្ទាប់។

ឯកឧត្តម តាំង សុខឃី ទីប្រឹក្សាផ្ទាល់សម្តេចព្រះមហាសង្ឃរាជ បួរ គ្រី, ជាប្រធានក្រុមប្រឹក្សាភិបាលនៃក្រុមហ៊ុន ឃី ចិន្តា ឌីវេឡុបម៉ិន ឯ.ក និងជាម្ចាស់កសិដ្ឋានដ៏ធំមួយ លើកឡើងថា នៅក្នុងអាណត្តិទី៧ នៃរដ្ឋសភា រាជរដ្ឋាភិបាល ដែលដឹកនាំដោយ សម្តេចមហាបវរធិបតី ហ៊ុន ម៉ា ណែត ជានាយករដ្ឋមន្រ្តីនៃព្រះរាជណាចក្រកម្ពុជា និងបន្តធានាស្ថិតភាពសេដ្ឋកិច្ច និងជំរុញកំណើន សេដ្ឋកិច្ចខ្ពស់ ដោយក្នុងនោះវិស័យសហគ្រាសធុនតូច និងមធ្យម (SMEs) រាជរដ្ឋាភិបាលបានផ្តល់ការយកចិត្តទុកដាក់ គាំទ្រ និង លើកកម្ពស់វិស័យឯកជន ជំរុញ បង្កើនឧត្តមភាពប្រកួតប្រជែង ដោយបង្កបរិយាកាសអំណោយផលដល់ការធ្វើធុរកិច្ច ជាក់ស្តែងការ ទទួលបានគ្រឿងឥស្សរិយយសពី រាជរដ្ឋាភិបាលនាពេលនេះ គឺមិនមែនកើតឡើងដោយចៃដន្យនោះឡើយ ពោលគឺម្ចាស់សហគ្រាស និងអ្នកដែលទទួលបានគ្រឿង ឥស្សរិយយសផ្សេងៗ សុទ្ធតែបានចូលរួមចំណែកដ៏សំខាន់ជាមួយរាជរដ្ឋាភិបាល ក្នុងការអភិវឌ្ឍសង្គម និងសេដ្ឋកិច្ចឱ្យកាន់តែរីកចម្រើន។

ដើម្បីចូលរួមអនុវត្តគោលនយោបាយរបស់រាជរដ្ឋាភិបាល ឯកឧត្តម តាំង សុខឃី បានអំពាវដល់អ្នកធ្វើកសិកម្ម បង្កើនការដាំ ដុះឱ្យបានខ្លាំងក្លា ដើម្បីជំរុញផ្គត់ផ្គង់ឆ្លើយតបតាមតម្រូវការទីផ្សារក្នុងស្រុក កាត់បន្ថយការនាំចូល ក្នុងនោះសម្រាប់ម្ចាស់សហគ្រាស ធុនតូច និងមធ្យម ត្រូវបង្កើនការផលិតឱ្យបានច្រើន ជាផលិតផលដែលមានស្តង់ដារ, ប្រសិនផលិតផលយើងមានគុណភាព មិនត្រឹម ឆ្លើយតបទីផ្សារក្នុងស្រុកប៉ុណ្ណោះទេ យើងនិងជំរុញដល់ការនាំចេញ ខណៈបច្ចុប្បន្នកម្ពុជាបានចុះកិច្ចព្រមព្រៀងពាណិជ្ជកម្មសេរីជាបណ្តាមួយចំនួន និងបានកំពុងបន្តនូវកិច្ចការនេះ ក្នុងគោលដៅគាំទ្រដល់ការរីកលូតលាស់សកម្មភាពសេដ្ឋកិច្ចក្នុងស្រុក៕

អត្ថបទ៖ សុន រ៉ាឌី