រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បាននិយាយនៅថ្ងៃសុក្រថា ការទទូចរបស់ប្រធានឃ្លាំមើលនុយក្លេអ៊ែរអង្គការសហប្រជាជាតិ ចង់ទៅពិនិត្យមើលទីតាំងនុយក្លេអ៊ែរ ដែលទម្លាក់គ្រាប់បែករបស់អ៊ីរ៉ង់ គឺ «គ្មានន័យ»។

លោកបានធ្វើការអត្ថាធិប្បាយនៅក្នុងការបង្ហោះនៅលើប្រព័ន្ធផ្សព្វផ្សាយសង្គម X ខណៈពេលដែលបានចោទប្រកាន់អគ្គនាយកទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi ពីការសម្របសម្រួលការអនុម័តសេចក្តីសម្រេចដោយក្រុមប្រឹក្សាភិបាលរបស់ទីភ្នាក់ងារនេះប្រឆាំងនឹងទីក្រុងតេអេរ៉ង់ និងការទម្លាក់គ្រាប់បែកនុយក្លេអ៊ែរអ៊ីរ៉ង់ដោយសហរដ្ឋអាមេរិក និងអ៊ីស្រាអែល។

លោកបាននិយាយថា៖«ការទទូចរបស់លោក Grossi ក្នុងការទៅទស្សនកិច្ចកន្លែងទម្លាក់គ្រាប់បែកក្រោមលេសនៃការការពារ គឺគ្មានន័យទេ ហើយអាចជាចេតនាអាក្រក់ក៏ថាបាន។ អ៊ីរ៉ង់រក្សាសិទ្ធិក្នុងការចាត់វិធានការណាមួយ ក្នុងការការពារផលប្រយោជន៍ប្រជាជន និងអធិបតេយ្យភាពរបស់ខ្លួន»។

លោកបានចង្អុលទៅផែនការថ្មីៗនេះ ដែលត្រូវបានអនុម័តដោយសភាអ៊ីរ៉ង់ ហើយក្រោយមកបានអនុម័តជាច្បាប់ដោយក្រុមប្រឹក្សាធម្មនុញ្ញរបស់ប្រទេសដែលបានអំពាវនាវឲ្យបញ្ឈប់កិច្ចសហប្រតិបត្តិការរបស់   អ៊ីរ៉ង់ជាមួយ IAEA ដោយបន្ថែមថា៖« នេះគឺជាលទ្ធផលផ្ទាល់នៃតួនាទីដ៏គួរឲ្យសោកស្តាយរបស់លោក Grossi ក្នុងការបំភាន់ការពិតដែលទីភ្នាក់ងារនេះ មានកាលពីមួយទសវត្សរ៍មុន បានបិទបញ្ចប់រាល់បញ្ហាកន្លងមក (ជាមួយអ៊ីរ៉ង់)»។

លោក Grossi កាលពីថ្ងៃសុក្របានគូសបញ្ជាក់ពីភាពចាំបាច់សម្រាប់ក្រុមអធិការកិច្ចរបស់ IAEA ដើម្បីបន្តសកម្មភាពផ្ទៀងផ្ទាត់របស់ពួកគេ នៅក្នុងប្រទេសអ៊ីរ៉ង់ «តាមតម្រូវការ នៅក្រោមកិច្ចព្រមព្រៀងការពារគ្រប់ជ្រុងជ្រោយ»។ នេះបើយោងតាមសេចក្តីថ្លែងការណ៍ដែលបានចេញផ្សាយនៅលើគេហទំព័ររបស់ទីភ្នាក់ងារនេះ។