យោងតាមការអះអាងរបស់មន្ទីរស្ទង់ភូគព្ភសាស្រ្តសហរដ្ឋអាមេរិក(USGS) បានឲ្យដឹងថា ការរញ្ជួយដីកម្រិត ៥,៣រ៉ិចទ័រ បានអង្រួនតំបន់ភាគកណ្តាលប៉ាគីស្ថាន នាព្រឹកថ្ងៃអាទិត្យនេះ ។

គ្មានសេចក្តីរាយការណ៍ភ្លាមៗនោះទេពីគ្រោះថ្នាក់ ឬការខូចខាតបណ្តាលមកពីការរញ្ជួយដីរាក់នេះ ដែល USGS រាយការណ៍ថា បានកើតឡើងនៅវេលាម៉ោង ៣ និង ៣០នាទីព្រឹកទាបភ្លឺ ម៉ោងក្នុងស្រុកថ្ងៃអាទិត្យនេះ ក្នុងនោះចំណុចកណ្តាលរបស់វាស្ថិតនៅចម្ងាយប្រហែល ៦០គ.មពីទីក្រុងភាគឦសាន Barkhan ស្ថិតក្នុងខេត្តតំបន់ភ្នំ Balochistan របស់ប្រទេសប៉ាគីស្ថាន ។

ប៉ាគីស្ថានមានព្រំដែនរួមជាមួយឥណ្ឌា និងស្ថិតនៅលើផ្លាកតិចតូនិកអឺរ៉ាស៊ី ធ្វើឲ្យប្រទេសមួយនេះងាយនឹងរញ្ជួយដី ។

តំបន់មួយនេះអាចនឹងពិបាកទៅដល់ អំឡុងស្ថានភាពវិបត្តិ ជាក់ស្តែងដូចកាលពីឆ្នាំ ២០១៥ ការរញ្ជួយដីកម្រិត ៧,៥រ៉ិចទ័រ នៅប្រទេសប៉ាគីស្ថាន និងអាហ្វហ្គានីស្ថាន បានសម្លាប់មនុស្សជិត ៤០០នាក់ នៅទូទាំងតំបន់ដែលរារាំងដំណើរការកិច្ចខិតខំជួយសង្រ្គោះ ។

ប៉ាគីស្ថាន រងការវាយប្រហារផងដែរដោយការរញ្ជួយដីកម្រិត ៧,៦រ៉ិចទ័រ កាលពីឆ្នាំ ២០០៥ ដែលបានសម្លាប់មនុស្សជាង ៧៣.០០០នាក់ និងមនុស្ស ៣,៥លាននាក់ផ្សេងទៀត គ្មានផ្ទះសម្បែងរស់នៅ ដោយភាគច្រើននៃពួកគេ នៅតំបន់កាស្មៀរគ្រប់គ្រងដោយប៉ាគីស្ថាន ៕