ប្រធានាធិបតីអាមេរិក លោក Donald Trump កាលពីថ្ងៃសុក្រ (២៧ មិថុនា) បាននិយាយក្នុងព្រឹត្តិការណ៍មួយនៅការិយាល័យ Oval Office ជាទីដែលលោកលើកឡើងពីការខិតខំប្រឹងប្រែងក្នុងការដោះស្រាយជម្លោះសកលថា លោកនឹង "ដោះស្រាយជម្លោះជាមួយកូរ៉េខាងជើង" ឱ្យបាន ប៉ុន្តែមិនបានបញ្ចាក់ច្បាស់ឡើយថាជាជម្លោះបែបណា ឬអាចកើតឡើងដោយសារមូលហេតុអ្វីនោះទេ។ 

នៅពេលត្រូវសាកសួរថា តើលោកបានសរសេរលិខិតទៅមេដឹកនាំកូរ៉េខាងជើង លោក Kim Jong Un ដូចដែលត្រូវរាយការណ៍នៅខែនេះដែរឬទេ លោក Trump មិនឆ្លើយសំណួរត្រង់ៗទេ ប៉ុន្តែនិយាយថា “រូបលោកមានទំនាក់ទំនងល្អជាមួយលោក Kim Jong Un និងត្រូវរ៉ូវគ្នាល្អណាស់ ដូច្នេះនឹងរង់ចាំមើលថានឹងមានអ្វីកើតឡើងបន្ទាប់"។ លោក Trump បន្តថា "មានអ្នកនិយាយថាអាចមានជម្លោះជាមួយកូរ៉េខាងជើង ប៉ុន្តែលោកគិតថា អាមេរិកនឹងអាចដោះស្រាយរឿងនេះបាន"។

គេហទំព័រ NK News មានមូលដ្ឋាននៅទីក្រុងសេអ៊ូល ដែលតាមដានកូរ៉េខាងជើង បានរាយការណ៍ក្នុងខែនេះថា គណៈប្រតិភូកូរ៉េខាងជើង នៅអង្គការសហប្រជាជាតិ ក្នុងទីក្រុងញូវយ៉ក បានបដិសេធម្តងហើយម្តងទៀតមិនទទួលយកលិខិតពីលោក Trump ទៅកាន់លោក Kim។

លោក Trump និងលោក Kim បានបើកកិច្ចប្រជុំកំពូលចំនួន៣លើកក្នុងអំឡុងពេលអាណត្តិទីមួយរបស់លោក Trump អំឡុងឆ្នាំ២០១៧-២០២១ ហើយបានផ្លាស់ប្តូរលិខិតមួយចំនួនដែលលោក Trump ហៅថា "ស្រស់ស្អាតណាស់" មុនពេលកិច្ចខិតខំប្រឹងប្រែងការទូតដែលមិនធ្លាប់មានពីមុនត្រូវបានបែកបាក់ ដោយសារការទាមទាររបស់សហរដ្ឋអាមេរិកឱ្យលោក Kim បោះបង់អាវុធនុយក្លេអ៊ែររបស់លោក៕