ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រ (២៧ មិថុនា) ថា លោកជឿជាក់ថាអាចទៅរួច ដែលថាបទឈប់បាញ់នៅក្នុងជម្លោះដែនដីហ្កាហ្សា រវាងអ៊ីស្រាអែល និងក្រុមសកម្មប្រយុទ្ធហាម៉ាស ដែលគាំទ្រដោយអ៊ីរ៉ង់ នឹងអាចសម្រេចបានក្នុងរយៈពេលមួយសប្តាហ៍។

ក្នុងព្រឹត្តិការណ៍មួយអបអរកិច្ចព្រមព្រៀងកុងហ្គោ-រ្វ៉ាន់ដានៅការិយាល័យ Oval Office លោក Trump បានប្រាប់អ្នកសារព័ត៌មានថា លោកជឿជាក់ណាស់ថាបទឈប់បាញ់ក្នុងសង្រ្គាមហ្កាហ្សាដ៏បង្ហូរឈាមនោះជិតមកដល់ហើយ។ លោកបន្តថា លោកទើបតែនិយាយជាមួយមនុស្សមួយចំនួនដែលពាក់ព័ន្ធនឹងកិច្ចប្រឹងប្រែងព្យាយាមឈានដល់ការបញ្ឈប់អរិភាពរវាងអ៊ីស្រាអែល និងក្រុមហាម៉ាស នៅក្នុងតំបន់ហ៊ុមព័ទ្ធឡេស្ទីននោះ។

ក្រុមហាម៉ាស និយាយថា ខ្លួនមានឆន្ទៈក្នុងការដោះលែងចំណាប់ថ្នូរសេសសល់នៅក្នុងតំបន់ហ្កាហ្សា ក្រោមកិច្ចព្រមព្រៀងណាមួយដើម្បីបញ្ចប់សង្គ្រាម ខណៈអ៊ីស្រាអែលនិយាយថា ខ្លួនអាចបញ្ចប់បានលុះត្រាតែក្រុមហាម៉ាស ត្រូវដកហូតអាវុធ និងរុះរើអស់ ប៉ុន្តែក្រុមហាម៉ាសបដិសេធមិនព្រមទម្លាក់អាវុធទេ។

ការទស្សន៍ទាយដ៏គួរឱ្យភ្ញាក់ផ្អើលរបស់លោក Trump ពីកិច្ចព្រមព្រៀងបទឈប់បាញ់ដែលអាចកើតមាននៅក្នុងប៉ុន្មានថ្ងៃខាងមុខនេះ បានកើតឡើងនៅពេលមានសញ្ញាតិចតួចណាស់ដែលថាភាគីជម្លោះទាំងពីរបានត្រៀមខ្លួនចាប់ផ្តើមការចរចាដ៏ម៉ឺងម៉ាត់ឡើងវិញ ឬងាកចេញពីជំហរទាមទារដែលបង្កភាពជាប់គាំងរបស់ពួកគេ៕