ក្រុមបាតុកររាប់រយនាក់ បានដើរដង្ហែរតាមដងផ្លូវឆ្លងកាត់ទីក្រុង Venice ដ៏ស្រស់ស្អាតរបសប្រទេសអ៊ីតាលី ដើម្បីតវ៉ាប្រឆាំងនឹងពិធីមង្គលការរបស់ស្ថាបនិកក្រុមហ៊ុន Amazon ដ៏ល្បីល្បាញគឺលោកមហាសេដ្ឋី Jeff Bezos នៅថ្ងៃទីបីនៃការប្រារព្ធពិធីមង្គលការច្រើនថ្ងៃរបស់លោក ដែលមានតម្លៃរាប់សិបលានដុល្លារ។

បុរសមានទ្រព្យសម្បត្តិបំផុតទីបួនរបស់ពិភពលោក គឺលោក Bezos និងកូនក្រមុំរបស់លោក ឈ្មោះថា Lauren Sanchez Bezos បានរៀបការក្នុងពិធីឯកជនមួយកាលពីថ្ងៃសុក្រ ជាមួយនឹងភ្ញៀវកិត្តិយសតារាល្បីៗប្រហែល ២០០នាក់ នៅលើកោះ San Giorgio ដ៏ស្ងប់ស្ងាត់។

ប៉ុន្តែមុនពេលពិធីជប់លៀងចុងក្រោយនៅល្ងាចថ្ងៃសៅរ៍ (២៨ មិថុនា) ដែលជាផ្នែកនៃព្រឹត្តិការណ៍អាពាហ៍ពិពាហ៍រយៈពេល ៣ថ្ងៃនោះ ក្រុមអ្នកតវ៉ាបានដើរចេញពាសពេញដងផ្លូវកណ្តាលទីក្រុង Venice ហើយបានកាន់បដាដែលសរសេរថា “ប្រឆាំងលោក Bezos” និង “គ្មានលោក Bezos គ្មានសង្រ្គាម”។ 

ក្នុងប៉ុន្មានថ្ងៃកន្លងមកនេះ អ្នកស្រុកបានតវ៉ាពាសពេញទីក្រុង ជុំវិញអ្វីដែលពួកគេនិយាយថា គឺជាការខឹងសម្បារ ខណៈទីក្រុង Venice ទទួលរងពីទេសចរណ៍ហួសកម្រិត តម្លៃផ្ទះដ៏ខ្ពស់កប់ពពក និងការគំរាមកំហែងឥតឈប់ឈរនៃទឹកជំនន់ ដែលបណ្ដាលមកពីបម្រែបម្រួលអាកាសធាតុ។

បាតុករម្នាក់បាននិយាយថា ពួកគេទៅទីនោះដើម្បី "បន្តបំផ្លាញផែនការរបស់ពួកអ្នកមានទ្រព្យទាំងនេះ ដែលប្រមូលប្រាក់ដោយការកេងប្រវ័ញ្ចកម្លាំងញើសឈាមអ្នកដទៃ និងខណៈពេលដែលស្ថានភាពនៃទីក្រុងនេះនៅតែមិនច្បាស់លាស់"៕