ក្រុមមន្ត្រីបាននិយាយថា មនុស្ស ៣នាក់បានស្លាប់ និងមនុស្ស ៦នាក់ បានរងរបួស នៅក្នុងការរត់ជាន់សង្កត់គ្នាដ៏ច្របូកច្របល់ក្នុងពិធីបុណ្យសាសនាមួយនៅភាគខាងកើតប្រទេសឥណ្ឌា នៅថ្ងៃអាទិត្យ (២៩ មិថុនា) នេះ។ លោក Y.B. Khurania អគ្គនាយកនគរបាលក្នុងរដ្ឋ Odisha បានប្រាប់សារព័ត៌មានរ៉យទ័រថា "មនុស្សបីនាក់បានស្លាប់ និងប្រាំមួយនាក់ទៀតរងរបួស ហើយមិនមាននរណាម្នាក់ធ្ងន់ធ្ងរទេ ហើយក្រៅពីនោះ មនុស្សទាំងអស់បានរួចផុតពីគ្រោះថ្នាក់"។

មន្ត្រីរដ្ឋបាលជាន់ខ្ពស់ម្នាក់ ដែលសុំមិនបញ្ចេញអត្តសញ្ញាណបានប្រាប់រ៉យទ័រថា ឧបទ្ទវហេតុនេះបានកើតឡើងនៅពេលព្រឹកព្រលឹម ខណៈអ្នកកាន់សាសនាហិណ្ឌូរាប់ពាន់នាក់ បានប្រមូលផ្តុំគ្នានៅឯពិធីបុណ្យរាជរថ ប្រចាំឆ្នាំនៅទីក្រុង Puri។

ការរត់ជាន់គ្នាបានកើតឡើងជាប្រចាំក្នុងអំឡុងពេលការប្រមូលផ្តុំសាសនាហិណ្ឌូដ៏ធំនៅក្នុងប្រទេសឥណ្ឌា ដែលមានប្រជាជនច្រើនជាងគេលើពិភពលោក ខណៈហ្វូងមនុស្សយ៉ាងច្រើនប្រមូលផ្តុំនៅកន្លែងចង្អៀត ដែលជារឿយៗមិនអើពើនឹងដំណើរការសុវត្ថិភាព។ កាលពីខែមករា ដើមឆ្នាំនេះ មនុស្សយ៉ាងហោចណាស់ ៣៩នាក់ ត្រូវបានសង្កត់ស្លាប់នៅក្នុងការរត់ជាន់គ្នាមុនពេលព្រលឹម ក្នុងអំឡុងពិធីបុណ្យ មហាកុម្ភមេឡា (Maha Kumbh Mela) ក្នុងក្រុង Prayagraj ភាគខាងជើងប្រទេសឥណ្ឌា៕