មេបញ្ជាការកងពលតូចដឹកជញ្ជូនលេខ៩៩ លោកឧត្តមសេនីយ៍ទោ ហ៊ុល សំអុន បានក្រើនរំលឹកដល់នាយទាហាន នាយទាហានរង ពលទាហានទាំងអស់នៃកងពលតូចដឹកជញ្ជូនលេខ៩៩ ត្រូវតែត្រៀមកម្លាំងមធ្យោបាយ និងសម្ភារៈដែលរាជរដ្ឋាភិបាលបំពាក់ឲ្យ ២៤ម៉ោង លើ២៤ម៉ោង និងដាច់ខាតត្រូវតែលើកកម្ពស់ស្មារតីទទួលខុសត្រូវលើតួនាទី និងភារកិច្ចរបស់កងយោធពលខេមរភូមិន្ទ។

ក្នុងឱកាសប្រជុំជួរប្រចាំសប្តាហ៍ លោកឧត្តមមសេន៍ទោ ហ៊ុល សំអុន បានដាក់បទបញ្ជាយ៉ាងម៉ឺងម៉ាត់ដល់នាយទាហាន នាយទាហានរង ពលទាហាននៃកងពលតូចដឹកជញ្ជូនលេខ៩៩ទាំងអស់ថា ដាច់ខាតត្រូវតែលើកកម្ពស់ស្មារតីទទួលខុសត្រូវលើតួនាទី និងភារកិច្ចរបស់កងយោធពលខេមរភូមិន្ទ ដើម្បីសម្រេចបានរាល់បទបញ្ជារបស់ថ្នាក់លើពេលមានសភាពការណ៍កើតឡើង។ មួយវិញទៀតត្រូវតែប្រកាន់ខ្ជាប់នូវវិជ្ជាជីវៈកងទ័ព ជៀសវាងការសេពគ្រឿងញៀនជាដើម។

លោកឧត្តមសេនីយ៍ទោមេបញ្ជាការកងពល បានរំលឹកថា« ក្នុងនាមយើងជាកងទ័ពដាច់ខាតត្រូវតែគោរពវិន័យ ក្លាហាន រឹងមាំ មានសាមគ្គីភាពផ្ទៃក្នុងល្អ រក្សាការសម្ងាត់របស់យោធាទើបសម្រេចបានជោគជ័យ ដើម្បីផលប្រយោជន៍ជាតិមាតុភូមិ។ ត្រូវត្រៀមកម្លាំង មធ្យោបាយ និងសម្ភារៈដែលរាជរដ្ឋាភិបាលបំពាក់ ២៤ម៉ោង លើ២៤ម៉ោង រងចាំឆ្លើយតបបទបញ្ជា»៕