អាជ្ញាធរអ៊ុយក្រែនបាននិយាយកាលពីថ្ងៃអាទិត្យថា អាកាសយានិកយន្តហោះចម្បាំង F-16 របស់អ៊ុយក្រែនម្នាក់ត្រូវបានសម្លាប់ ខណៈកំពុងវាយរុញច្រានការវាយប្រហាររបស់រុស្ស៊ីកាលពីពេលយប់ដែលបានប្រើប្រាស់យានដ្រូនរាប់រយគ្រឿង មីស៊ីលបាលីស្ទីកនិងមីស៊ីលស៊ីបគោលដៅ។

នៅក្នុងទីក្រុងគីវ ក្រុមគ្រួសារជាច្រើន បានមកប្រមូលផ្តុំគ្នានៅក្នុងស្ថានីយ៍រថភ្លើងក្រោមដីដើម្បីស្វែងរកទីជម្រក បន្ទាប់ពីសំឡេងស៊ីរ៉ែនវាយប្រហារតាមអាកាសបានរោទិ៍ឡើង។ ការបាញ់កាំភ្លើងយន្ត និងការផ្ទុះ ត្រូវបានគេឮនៅទូទាំងរដ្ឋធានី និងនៅភាគខាងលិចទីក្រុង Lviv ជាកន្លែងដែលការវាយប្រហារបែបនេះពុំសូវកើតមានទេ។ រុស្ស៊ី បានបង្កើនបាញ់ស្រោចតាមអាកាសនៅពេលយប់ក្នុងប៉ុន្មានសប្តាហ៍ថ្មីៗនេះ ដែលបានបង្កការបំផ្លាញយ៉ាងរាលដាល និងបានសម្លាប់ជនស៊ីវិលជាច្រើននាក់។



កងទ័ពអាកាសអ៊ុយក្រែនបាននិយាយថា អាកាសយានិកបានធ្វើអ្វីៗគ្រប់យ៉ាងដែលលោកអាចធ្វើបាន ហើយបានហោះចេញពីទីតាំងមួយកន្លែង ប៉ុន្តែគ្មានពេលវេលាដើម្បីរំដោះខ្លួនចេញពីយន្តហោះ។ ទីក្រុង គីវ មិនបានបង្ហាញថាតើយន្តហោះ F-16 ប៉ុន្មានគ្រឿងដែលខ្លួនបានធ្វើប្រតិបត្តិការនោះទេ ប៉ុន្តែវាត្រូវបានប្រើប្រាស់យ៉ាងច្រើនក្នុងវិស័យការពារអាកាសរបស់អ៊ុយក្រែន។

បច្ចុប្បន្ននេះ ទីក្រុងបានបាត់បង់ចំនួនបីគ្រឿង ចាប់តាំងពីចាប់ផ្តើមធ្វើប្រតិបតត្តិការយន្តហោះផលិតដោយសហរដ្ឋអាមេរិកកាលពីឆ្នាំមុន។ ប្រធានាធិបតី លោក Volodymyr Zelenskiy បានអំពាវនាវឱ្យមានការគាំទ្របន្ថែមទៀតពីសម្ព័ន្ធមិត្តលោកខាងលិច ដើម្បីបង្កើនការការពារដែនអាកាសរបស់អ៊ុយក្រែន បន្ទាប់ពីការវាយប្រហារ។ ក្រោមការដឹកនាំរបស់លោកប្រធានាធិបតី Donald Trump ទីក្រុងវ៉ាស៊ីនតោន ពុំបានប្តេជ្ញាចិត្តចំពោះជំនួយយោធាថ្មីសម្រាប់អ៊ុយក្រែននោះទេ។