មនុស្សរាប់ពាន់នាក់កាលពីថ្ងៃអាទិត្យ បាននាំគ្នាបិទផ្លូវក្នុងប្រទេសស៊ែរប៊ី ដោយខឹងសម្បារ ចំពោះការចាប់ខ្លួនអ្នកតវ៉ាប្រឆាំងរដ្ឋាភិបាល ដែលបានប៉ះទង្គិចជាមួយនគរបាល នៅបន្លែងប្រមូលផ្តុំដ៏ធំមួយ កាលពីថ្ងៃសៅរ៍ ដើម្បីទាមទារឲ្យមានការបោះឆ្នោតមុនកាលកំណត់។

ក្រុមអ្នកតវ៉ា បានដាក់របងដែក និងធុងសំរាម នៅទីតាំងផ្សេងៗ ក្នុងរដ្ឋធានីបែលក្រាដ ( Belgrade) ហើយក៏បានបិទស្ពានសំខាន់មួយឆ្លងកាត់ទន្លេ Sava ផងដែរ។ ក្រុមបាតុករ នៅភាគខាងជើងទីក្រុង Novi Sad បានគប់ស៊ុតទៅលើការិយាល័យរបស់គណបក្សវឌ្ឍនភាពស៊ែរប៊ី ( Serbian Progressive Party) ដែលកំពុងកាន់អំណាច។

ប្រព័ន្ធផ្សព្វផ្សាយស៊ែរប៊ី បាននិយាយថា ការបិទផ្លូវដោយសារតវ៉ាស្រដៀងគ្នានេះ ត្រូវបានធ្វើឡើង នៅក្នុងទីក្រុងតូចៗ ក្នុងប្រទេសតំបន់បាល់កង់នេះ។

កាលពីថ្ងៃអាទិត្យ បាតុករបានទាមទារឲ្យអាជ្ញាធរដោះលែងនិស្សិតសាកលវិទ្យាល័យរាប់សិបនាក់ និង   បាតុករផ្សេងទៀត ដែលជាប់ពន្ធនាគារពីបទវាយប្រហារនគរបាល ឬជុំវិញការចោទប្រកាន់ថា បានរៀបចំផែនការផ្តួលរំលំរដ្ឋាភិបាល នៅឯការជួបជុំក្នុងទីក្រុងបែលក្រាដ កាលពីថ្ងៃសៅរ៍។

មនុស្សរាប់ម៉ឺននាក់ បានចូលរួមការប្រមូលផ្តុំ ដែលធ្វើឡើង បន្ទាប់ពីរយៈពេលជិត ៨ខែនៃការមិនចុះសម្រុងគ្នា ដែលបានធ្វើឲ្យលោកប្រធានាធិបតីប្រជាជននិយមលោក Aleksandar Vucic ប្រឈម       នឹងបញ្ហាធ្ងន់ធ្ងរ។ 

ក្រុមបាតុករ ក៏បានប្រកាសថា រដ្ឋាភិបាលប្រជានិយមបច្ចុប្បន្ននេះ «មិនស្របច្បាប់» និងដាក់ការទទួលខុសត្រូវចំពោះអំពើហិង្សាណាមួយ ទៅលើរដ្ឋាភិបាលនេះ។