សេវាសន្តិសុខរបស់អ៊ីស្រាអែល បាននិយាយកាលពីថ្ងៃអាទិត្យថា ខ្លួនបានបំបែកបណ្តាញក្រុមសកម្មប្រយុទ្ធហាម៉ាស នៅតំបន់វេសបែង (West Bank) ដែលសង្ស័យថា បានរៀបចំផែនការវាយប្រហារ ដោយចាប់ខ្លួនសមាជិករបស់ក្រុមនេះ ចំនួន ៦០នាក់។

ទីភ្នាក់ងារសន្តិសុខផ្ទៃក្នុង Shin Bet បាននិយាយនៅក្នុងសេចក្តីថ្លែងការណ៍មួយថា៖«ហេដ្ឋារចនាសម្ព័ន្ធ ដ៏សំខាន់ ស្មុកស្មាញ និងដ៏ធំរបស់ក្រុមហាម៉ាស ត្រូវបានលាតត្រដាង» នៅក្នុងទីក្រុងHebronនៃតំបន់   វេសបែង»។

ទីភ្នាក់ងារនេះ បាននិយាយថា ខ្លួនបានបំបែកក្រុមសកម្មប្រយុទ្ធចំនួន ១០ក្រុម ដែល «ប្រតិបត្តិការ ដើម្បីធ្វើការវាយលុកក្នុងទម្រង់ផ្សេងៗគ្នា ក្នុងពេលវេលាភ្លាមៗ»។

យោងតាមសេចក្តីថ្លែងការណ៍បានឲ្យដឹងថា មេដឹកនាំក្រុមហាម៉ាស «បានធ្វើការដើម្បីជ្រើសរើស បំពាក់អាវុធ និងបណ្តុះបណ្តាលប្រតិបត្តិករហាម៉ាសបន្ថែមពីតំបន់នេះ ដើម្បីធ្វើការបាញ់ប្រហារ និងទម្លាក់គ្រាប់បែកប្រឆាំងនឹងគោលដៅរបស់អ៊ីស្រាអែល»។

ទីភ្នាក់ងារ Shin Bet បាននិយាយថា ប្រតិបត្តិការរួមគ្នារយៈពេលបីខែជាមួយយោធា និងនគរបាល គឺជាការស៊ើបអង្កេតដ៏ធំបំផុតរបស់ខ្លួន នៅក្នុងតំបន់វេសបែង «ក្នុងមួយទសវត្សរ៍កន្លងមកនេះ»។