ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) កាលពីថ្ងៃសៅរ៍ បានសម្តែងការព្រួយបារម្ភអំពីការកើនឡើងនៃចំនួនជនអាហ្វហ្គានីស្ថានដែលត្រឡប់មកពីប្រទេសអ៊ីរ៉ង់ ក្រោមលក្ខខណ្ឌដ៏លំបាក ដោយបានព្រមានថា ការវិលត្រឡប់ក្នុងទ្រង់ទ្រាយធំ អាចធ្វើឲ្យស្ថានការណ៍ដ៏ផុយស្រួយនៅប្រទេសអាហ្វហ្គានីស្ថាន កាន់តែធ្ងន់ធ្ងរឡើង។

យោងតាម UNHCR បានឲ្យដឹងថា ជនជាតិអាហ្វហ្គានីស្ថានជាង ៦៤០.000នាក់ បានវិលត្រឡប់មកពីប្រទេសអ៊ីរ៉ង់ ចាប់តាំងពីការអនុវត្តកាលបរិច្ឆេទនៃការត្រឡប់មកវិញដោយរដ្ឋាភិបាលនៅថ្ងៃទី ២០ ខែមីនា ឆ្នាំ ២០២៥។

លោក Arafat Jamal តំណាងរបស់អង្គការ UNHCR ប្រចាំប្រទេសអាហ្វហ្គានីស្ថាន បាននិយាយថា៖« យើងត្រូវធ្វើសកម្មភាពឲ្យបានឆាប់រហ័ស។ យើងអំពាវនាវជាបន្ទាន់ដល់សហគមន៍អន្តរជាតិ ឲ្យជួយយើងឆ្លើយតប មិនមែនត្រឹមតែជំនួយសង្គ្រោះបន្ទាន់ប៉ុណ្ណោះទេ ប៉ុន្តែថែមទាំងជាមួយនឹងការគាំទ្ររយៈពេល   វែង។ ការផ្តល់មូលនិធិសម្រាប់ការធ្វើសមាហរណកម្មប្រកបដោយនិរន្តរភាព គឺចាំបាច់ដើម្បីទប់ស្កាត់វដ្តនៃអស្ថិរភាព និងការផ្លាស់ទីលំនៅ»។ 

របាយការណ៍បានកត់បញ្ជាក់ថា សរុបមក ជនជាតិអាហ្វហ្គានីស្ថានជាង ១,២ លាននាក់ បានត្រឡប់ពី   អ៊ីរ៉ង់ និងប៉ាគីស្ថាន មកទល់ពេលនេះ ក្នុងឆ្នាំ ២០២៥។

របាយការណ៍បានបន្ថែមថា ទីភ្នាក់ងារនេះ បន្តតស៊ូមតិជាមួយរដ្ឋាភិបាលក្នុងតំបន់ថា ការវិលត្រឡប់ទៅកាន់ប្រទេសអាហ្វហ្គានីស្ថានវិញ ត្រូវតែមានការស្ម័គ្រចិត្ត សុវត្ថិភាព និងសេចក្តីថ្លៃថ្នូរ។ ការបង្ខំ ឬដាក់សម្ពាធលើជនជាតិអាហ្វហ្គានីស្ថានឲ្យត្រឡប់មកវិញ គឺគ្មាននិរន្តរភាព ហើយអាចធ្វើឲ្យមានអស្ថិរភាពក្នុងតំបន់ និងលើសពីនេះទៅទៀត។

ជនភៀសខ្លួនអាហ្វហ្គានីស្ថានប្រមាណ ៧លាននាក់ ភាគច្រើន គឺគ្មានឯកសារ នៅតែស្នាក់នៅក្រៅប្រទេស ជាចម្បងនៅក្នុងប្រទេសជិតខាងអ៊ីរ៉ង់ និងប៉ាគីស្ថាន។