ប្រធានាធិបតីអាមេរិក លោក Donald Trump បានបញ្ជាក់ថា លោកមិនមានគម្រោងពន្យារពេលការផ្អាកវិធានការចំនួន ៩០ថ្ងៃ លើប្រទេសភាគច្រើន ឲ្យហួសពីកាលកំណត់ថ្ងៃទី៩ ខែកក្កដា នៅពេលដែលរយៈពេលចរចាដែលលោកបានកំណត់ពីមុន នឹងត្រូវផុត ហើយមេដឹកនាំមកពីបក្សសាធារណរដ្ឋរូបនេះ បាននិយាយថា ជំនួសឲ្យការពន្យារកាលកំណត់នោះ រដ្ឋបាលរបស់លោកនឹងផ្ញើលិខិតទៅកាន់ប្រទេសនានា ដោយដាក់ចេញនូវទណ្ឌកម្មពាណិជ្ជកម្មដែលប្រទេសទាំងនោះត្រូវប្រឈម ប្រសិនបើកិច្ចព្រមព្រៀងជាមួយសហរដ្ឋអាមេរិក មិនមានទេនោះ។

ប្រធានាធិបតីអាមេរិកធ្លាប់បានបង្ហើបពីការផ្ញើលិខិតស្រដៀងគ្នានេះ កាលពីខែឧសភា និងដើមខែនេះ ទោះបីជាការចរចានៅតែបន្តមាន។ ហើយក្នុងបទសម្ភាសន៍មួយ នៅលើកញ្ចក់ទូរទស្សន៍ Fox News កាលពីថ្ងៃអាទិត្យ (ទី២៩ ខែមិថុនា) នៅពេលត្រូវបានសួរថា តើការផ្អាកនេះនឹងមិនត្រូវបានពន្យារពេលទេមែនទេ លោក Trump បានឆ្លើយតបថា៖ «ខ្ញុំមិនគិតថា ខ្ញុំនឹងត្រូវការធ្វើបែបនោះទេ ពីព្រោះខ្ញុំអាចធ្វើបាន តែវាមិនមានអ្វីធំដុំនោះឡើយ»។

តែផ្ទុយទៅវិញ លោកបានបញ្ជាក់ពីជំហររបស់លោកយ៉ាងច្បាស់បន្ថែមទៀត ពាក់ព័ន្ធនឹងថ្ងៃផុតកំណត់ថ្ងៃទី៩ ខែកក្កដា ដោយនិយាយថា៖ «ខ្ញុំនឹងផ្ញើលិខិត។ នោះគឺជាការកំណត់ចុងក្រោយនៃកិច្ចព្រមព្រៀងពាណិជ្ជកម្ម»។ លោកបាននិយាយថា៖ «ផ្ទុយទៅវិញ ខ្ញុំគ្រាន់តែចង់ផ្ញើសំបុត្រទៅពួកគេ (ប្រទេសនានា) ជាលិខិតយុត្តិធម៌មួយ ដោយប្រាប់ថា អបអរសាទរ យើងនឹងអនុញ្ញាតឲ្យអ្នកធ្វើពាណិជ្ជកម្ម នៅសហរដ្ឋអាមេរិក។ អ្នកនឹងបង់ពន្ធ ២៥ភាគរយ ឬ ២០ភាគរយ ឬ ៤០ ឬ ៥០ភាគរយ។ ខ្ញុំពេញចិត្តធ្វើបែបនោះជាង»។

លោក Trump បានបញ្ជាក់បន្ថែមទៀតថា លិខិតដែលផ្ញើដោយរដ្ឋបាលរបស់លោក នឹងពន្យល់អំពីការកំណត់អត្រាពន្ធរបស់សហរដ្ឋអាមេរិក ដោយលើកឡើងពីឱនភាពពាណិជ្ជកម្មជាមួយប្រទេសនីមួយៗ និងរបៀបដែលពួកគេធ្វើដាក់អាមេរិក ដោយណែនាំថា ការចរចានឹងមិនត្រូវបានទាមទារនោះឡើយ ក្នុងករណីខ្លះ។ 

គួរបញ្ជាក់ថា រដ្ឋបាលរបស់លោក Trump បានកំណត់គោលដៅឈានដល់កិច្ចព្រមព្រៀងពាណិជ្ជកម្មចំនួន ៩០ ក្នុងរយៈពេល ៩០ថ្ងៃ។ តែលោក Trump បាននិយាយនៅក្នុងបទសម្ភាសថា៖ «មានប្រទេសចំនួន ២០០ ដែលអ្នកមិនអាចពិភាក្សាជាមួយពួកគេទាំងអស់បានឡើយ»៕