ក្នុងសុន្ទរកថាដែលផ្សាយតាមទូរទស្សន៍ កាលពីថ្ងៃអាទិត្យ (ទី២៩ ខែមិថុនា) អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ល្បឿននៃកិច្ចចរចា ដើម្បីដោះស្រាយបញ្ហាសង្រ្គាម នៅអ៊ុយក្រែន គឺអាស្រ័យលើជំហររបស់ទីក្រុងគីវ ប្រសិទ្ធភាពនៃការសម្របសម្រួលរបស់សហរដ្ឋអាមេរិក និងស្ថានភាពនៅសមរភូមិ។

រយៈពេល ៥ខែ នៅក្នុងអាណត្តិរបស់លោកប្រធានាធិបតីអាមេរិក Donald Trump មិនមានសញ្ញាបញ្ចប់ច្បាស់លាស់នោះឡើយ សម្រាប់សង្រ្គាមដែលរុស្ស៊ីបានចាប់ផ្តើមឡើងកាលពីខែកុម្ភៈ ឆ្នាំ២០២២ លើប្រទេសជិតខាងតូចជាងខ្លួន ទោះបីជាយុទ្ធនាការឆ្នាំ២០២៤ របស់លោក បានប្តេជ្ញាថា នឹងបញ្ចប់ជម្លោះនេះត្រឹមមួយថ្ងៃក៏ដោយ។ 

លោក Trump ដែលបានជំរុញភាគីទាំង២ ឲ្យឆ្ពោះទៅរកកិច្ចចរចាបទឈប់បាញ់ចាប់តាំងពីលោកបានស្បថចូលកាន់តំណែង នៅខែមករា បាននិយាយកាលពីថ្ងៃសុក្រចុងសប្ដាហ៍កន្លងមកថា លោកគិតថា «នឹងមានអ្វីមួយកើតឡើង» ពាក់ព័ន្ធនឹងដំណោះស្រាយសង្រ្គាមនេះ។

អំឡុងពេលផ្ដល់បទសម្ភាសជាមួយប្រព័ន្ធផ្សព្វផ្សាយរបស់បេឡារុស គឺ 1 TV ដែលជាប៉ុស្តិ៍ទូរទស្សន៍រដ្ឋដ៏ធំ នៅក្នុងប្រទេសជិតខាងរបស់រុស្ស៊ី លោក Peskov បានប្រាប់ថា៖ «ជាទូទៅ បញ្ហាជាច្រើនគឺអាស្រ័យទៅលើជំហររបស់របបទីក្រុងគីវ ហើយវាអាស្រ័យលើប្រសិទ្ធភាពនៃកិច្ចប្រឹងប្រែងសម្របសម្រួលរបស់ទីក្រុងវ៉ាស៊ីនតោន»។ ជាមួយគ្នានេះ លោកបានបន្ថែមថា ស្ថានភាពនៅសមរភូមិ គឺជាកត្តាមួយផ្សេងទៀតដែលមិនអាចព្រងើយកន្តើយបាននោះឡើយ។

យ៉ាងណាក្ដី លោក Peskov មិនបានបញ្ជាក់លម្អិត អំពីអ្វីដែលក្រុងមូស្គូ រំពឹងចង់បានពីក្រុងវ៉ាស៊ីនតោន ឬទីក្រុងគីវទេ។ ទីក្រុងមូស្គូបាននិងកំពុងទាមទារថា អ៊ុយក្រែនត្រូវព្រមប្រគល់ដែនដីបន្ថែមទៀត ហើយត្រូវបោះបង់មិនទទួលយកការគាំទ្រផ្នែកយោធារបស់លោកខាងលិច ជាលក្ខខណ្ឌដែលទីក្រុងគីវ ប្រាប់ថា មិនអាចទទួលយកបានឡើយ។ បើទោះបីជាគ្មានកាលបរិច្ឆេទត្រូវបានកំណត់នៅឡើយ សម្រាប់កិច្ចចរចានាពេលបន្ទាប់ ក៏លោក Peskov បានប្រាប់ថា រុស្ស៊ីសង្ឃឹមថា កាលបរិច្ឆេទនឹងលេចឡើងយ៉ាងច្បាស់លាស់ «ក្នុងពេលអនាគតដ៏ខ្លី»៕